Shillong, Naiwieng, 09: Ka Lympung jong ka Seng kynthei ka 36-Lachumiere, East Khasi Hills District Shillong, ka kong M.Blah ba dei ka General Secretary Ka Lympung Ki Seng Kynthei Athoubah bad ka kong T. Phanbuh, ka President Ka Lympung Ki Seng Kynthei, kila phah da ka shithi sha u Myntri Rangbah ka jylla Meghalaya, u Conrad K. Sangma ha kaba iadei bad ka jaka ring um ha u Lum Shyllong.
Ha katei ka shithi, kila pyntip ba ka kane ka Lympung Ki Seng Kynthei, kawei ka kynhun kaba pyniad bad pynsnoh iaki seng kynthei bapher bapher ha Shillong, kala pdiang iaka shithi kaba iaid ha ka 01 tarik Naiwieng 2026 na ka Joint Action Committee (JAC) kaba pyrshah iaka Shillong Ropeway Project bad na ka bynta ka jingiada iaki jaka ring um ha U Lum Shyllong.
Kila ong ba kum ki kmie, ki don ka jingsngewkhia kaba jylliew ba kane ka projek kan ktah iaki tyllong um bad iaka mariang. Kila ong ba ka seng jong ki ka ieng halor ka nongrim ban iada iaka mariang bad ban pyrshah iaka jingjot jong ka. ki sngew ba kino kino ki projek lane ki jingkyntiew pynroi ki ban ktah iaka mariang kim dei ban treikam satia ha kino kino ki rukom.
Halor katei ka shithi, ki kyrpad ban ban iakren bad ki dkhot jong ka JAC, namar ki jingeh ki lah ban jem tang lyngba ka jingiakren. Ki sngewkhia palat ban ynda iohi ba ka jingpyrshah ka nang kham khraw bad nang khlain.
Ka sorkar ka lah ban pynlong ia kawei ka komiti da ki riew shemphang na ki tnad sorkar bapher bapher kiba iadei bad ki katto katne ki briew kiba don ka jingtip kaba bha na ka imlang sahlang. Kane ka komiti ka lah ban ai jingmut, ki nia bad ki jingtyrwa ki ban tei na ka bynta ki lad ki lynti bapher bapher.
Te kumta kane ka Seng ka kyrpad biang sa shisien ban niewburom iaka jingsngew bad ka sur jong ki paidbah. Kila ong ba hapoh ka jingpyniaid bad ka jingialam kaba shitrhem jong kane ka sorkar, ki kyrmen bad khmih lynti iaka jingmap bad ka jingpyrkhat ba bha jong ki iaki jingtyrwa kiba rit jong ki.
Ha kane ka shithi, la pyniasoh lang iaka kyrteng jong u Myntri ka kam jngohkai pyrthei, sorkar Meghalaya, u bah Paul Lyngdoh.
