Shillong, Naiwieng, 09: U Myntri Rangbah ka jylla Meghalaya, u Conrad K. Sangma mynta ka sngi u la leit buh maw nongrim na ka bynta ka skhim ban shna surok ba kot haduh T. 136 klur naduh Chokpot haduh Kharukol, kaba long ka lad pyniasoh bakhraw kaba thmu ban pynsuk iaki paidbah nongleit nongwan ha kylleng ka Ri Lum Garo jong ka thain shathie.
Ha katei ka jingialang ha Chokpot, u Sangma u la ong ba kane ka distrik kala sahdien ha ka jingroi bad kiwei kiwei ki jingtei ban ia kiwei kiwei ki thain jong ka jylla Meghalaya la bun bun snem. Hynrei, u la ong ba kane kan sa wan ka jingkylla ha ka jingdon ka jingialam jong ka sorkar NPP.
U Conrad u la ong ba ki sorkar ba mynshuwa bad ki MLA kila pyrshang ban pyn ioh iaka projek shna surok hynrei la pulom noh. Katba kane ka sorkar bad mynta kan pynioh haduh T. 136 klur na ka bynta ka projek shna surok ha ka jingiatreilang bad ka Union Ministry of Rural Development.
U la ai khublei ia u Myntri ka sorkar pdeng bad dei peit iaka roi ka par ha nongkyndong, u Shivraj Singh Chouhan na ka bynta ka jingwanrah jong u ia kane ka projek bad u la ong ruh ba kane ka projek ka dei kaba la dep ioh shwa ha Meghalaya, lem bad ka kynhun kaba la pdiang sa ar tylli ki projek ha kane ka jylla.
Haba kren shaphang kane ka projek, la ong ba iaka surok ba jngai 46.08 kilometre yn sdang na ka iew Chokpot, pyniasoh sha ka NH 217 (kaba la tip mynshuwa ka NH 62) ha Siju bad yn bteng shaduh Kharukol. Kan sa pynsuk iaki 14 tylli ki shnong, kynthup iaka Warima, Budugre, Dagalgre, Kakhija, Kilbomagre, Papa Asakgre, Dobogre, Rekmangre, Paromgre, Dabalgre, Nokatgre, Tolegre, Nengrugittim bad Siju, kaba ka jingbun ki briew ka long 5,783 ngut.
La khmih lynti ba kane ka surok kan pynlyngkot iaka lynti na Chokpot sha Shillong bad Guwahati. Kan sa pynbha shuh shuh iaka jingpyniasoh hapdeng ka Tura bad ki jaka jngohkai pyrthei ha western South Garo Hills.
Kawei na ki bynta jong kane ka kam pynheh surok ka long ban pynheh iaka surok halor ki kyndon intermediate-lane standards bad ban shna kynthup iaki khyndai tylli ki jingkieng RCC, ki ba nyngkong, ki nala paka, ki kynroh ba skhem bad kiwei kiwei. Ka kam tih khyndew ka la jia ha ka kilomitar 30, katba ka jingpynkhreh pynkynriah iaki tiar bad ki briew ka dang iaid shakhmat.
U Sangma u la ong ba ka Chokpot kan sa mih pyrthei kum ka shnong pdeng ba donkam kaba pyniasoh iaka South bad West Garo Hills. Ka sorkar kan thmu iaka jingroi jingsan jong ka lyngba ki lad pynroi iaka ioh ka kot, ka koit ka khiah, ka pule dangle bad ki kam khaii pateng.
Ha katei ka prokram, ka don lang u MLA ka Chokpot, u Sengchim N. Sangma, Rongara Siju MLA Rakkam A. Sangma, ki MDC, ki MDC barim bad ki MLA, ki heh nongtrei ba pyniaid iaka distrik, ki nongmihkhmat jong ki tnad bapher bapher bad ki katto katne ki dkhot jong ki paidbah.
