Shillong, Naiwieng 09: Ka Khasi Students’ Union (KSU), mynta ka sngi, ka la mudui da ka ejahar sha u Superintendent of Police, East Jaintia Hills District, Khliehriat, halor ka jingjia kaba la jia ha ka 7 tarik u Naiwieng, 2026, ha kaba ki briew kiba don ha ka 8 haduh 10 ngut, kiba la rah ïa ki tiar pynmynsaw kum ki wait, ki dieng bad ki jri, ki la pyrshang ban khanglad bad byrngem ïa ki nongshong shnong ka Shnongrim bad ïa ki nongïalam jong ka seng.
Ka jingleit jong ki Nongialam ka Seng ha ka 7 tarik u Naiwieng sha ka shnong Daistong bad Shnongrim ka long shi bynta ban ïa kynduh bad ïa syllok bad ki nongshong shnong jong katei ka thaiñ, khamtam halor ka jingthmu jong ka Shree Cement ban pynieng ïa ka karkhana shna dewbilat ha Daistong.
Ha katei ka jingleit, ki Nongialam ki la ïoh ban ïa kynduh bad ki nongïalam jong kine ki ar tylli ki shnong ban ïa kren halor ki jingeh bad ki jingsngewkhia jong ki nongshong shnong kiba ïadei bad ka jingthmu jong ka Shree Cement, kumjuh ruh halor kiwei pat ki mat kiba ktah ïa ka bha ka miat jong ki shnong.
Ka nongrim jong ka Seng ha kane ka jingleit ka long ban ïa syllok, ai jingkyrshan bad pynshlur ïa ki paradoh parasnam ba kin ïaineh ha ka jingïakhun jong ki pyrshah ïa ka jingwan jong ka Shree Cement ha katei ka thaiñ, katba ka jingtohkit jong ka Fact Finding Committee ka dang ïaid shakhmat.
Ha kane ka jingleit, ka Seng ka la wan ryngkat bad katto katne ngut ki nongthoh khubor ban sakhi ïa ki kam bad ki jingïaid jong ka ha Daistong. Ka Seng kala pynlong ruh ïa ka jingïalang kaba lyngkot ban ïa phylliew jingmut bad ban ïa kren halor kiba bun ki mat kiba ïadei bad ka jinglong jingman jong katei ka thaiñ. Ha katei ka jingïalang, la sakhi ïa ka jingwan shim bynta jong ki riew rangbah, ki longkmie bad ki samla jong ka shnong.
Hadien ba la pynkut ïa ka jingïalang, ka Seng, ryngkat bad ki nongïalam shnong, ka la leit ban jurip ïa ka jaka ba la thmu ban pynieng ïa ka Cement Plant, khnang ban tip ïa ka jinglong jingman jong katei ka jaka bad ban lap la ki don ne em ki kam pynkhreh kiba dang ïaid ha katei ka jaka, katba ka Fact Finding Committee ka dang pynlong ïa ka jingtohkit.
Hynrei, ha ka por ba ka Seng bad ki nongshong shnong ki dang leit jurip, kynsan kynsan la mih kumba 6 haduh 10 ngut ki briew kiba la kah durkhmat bad pyrshang ban khanglad ïa ka Seng bad ki nongshong shnong ban ïaid lynti. Kine ki briew ki la sei ruh ïa ki tiar pynmynsaw, kynthup ïa ki wait ki dieng bad ki jri bad ki la pyrshang ruh ban thombor ïa uwei na ki dkhot jong ka Seng.
Ha katei ka por, ka Seng ka la hap ban ïada ïalade, katba ki nongïalam jong ka ki dang pyrshang ban pynjem ïa ka jingïakynad. Kane ka jingjia ka la kylla long ka jingïapyni bor kaba la paw ruh ha ki lad pathai khubor. Hadien kata, kine ki briew ki la mih noh na katei ka jaka bad leit sha ka jaka ba don ki pulit.
Kaba kham sngewkhia ka long ba hadien katei ka jingjia, haba ki nongïalam jong ka Seng ki la leit ban pyntip sha ki pulit kiba don ha katei ka thaiñ, kim shym la shim ïa ki sienjam kiba donkam ban kem ïa kiba ki donkti, watla ka Seng ka la pan jingïarap. Hynrei ki Pulit ki la ailad ïa kitei ki briew ban mih noh na katei ka jaka.
Ka jingbym shimkhia jong ki pulit ka la pynlong ïa u General Secretary jong ka Seng ban phone ruh ïa u SP ban pyntip halor katei ka jingjia. Hynrei, wat hadien kane, kam shym la don kano kano ka sienjam kaba seisoh ban shimkhia ïa katei ka kam.
Ka Seng ka pynpaw ba kane ka jingjia ka la pynmih ïa ka jingsuba kaba jur halor ka rukom treikam jong ki pulit, ba ka lah ban don ka jingïatreilang hapdeng kitei ki briew kiba pyrshah ïa ka KSU bad ki bor pulit.
Kaba pynlyngngoh bad sngewkhia shuh shuh ïa ka Seng ka long ba hadien katei ka jingjia, u Miki Sukhlaiñ, u Khreh Sukhlaiñ bad katto katne ngut kiwei pat ki briew kiba la kah durkhmat, kiba la sei ïa ki tiar pynmynsaw bad pyrshang ban khanglad ïa ka lynti, ki la mih pat bad kynnoh ba ki la shah shoh.
Ka Seng ka pynpaw ba ka don ka jingïapher kaba shai hapdeng ka jingshisha bad ka jingpyrshang ban pynkylla ïa ka jingshisha. Ki dur khih (videos) kiba la paw ha ki lad pathai khubor ki dei ki sakhi kiba donkam ban peit bniah khnang ban lap ïa ka jingshisha halor katei ka jingjia.
Ka Seng ka sngewkhia ba kum kine ki jingjia ki lah ban dei ka jingpyrshang jong katto katne ngut ki briew kiba ïadei bad ki nongkyrshan ne ki agent jong ka Shree Cement ban pynmih ïa ka jingïakynad bad ban kynshoit ïa ka Seng. Namarkata, ka Seng ka dawa ïa ki bor ba dei khmih ba kin tohkit bniah ïa katei ka jingjia bad ban pynlong ïa ka jingbishar kaba hok, khlem da shah liang.
Ka Seng ka kwah ban phah ïa ka khubor kaba shai sha baroh kiba don bynta ha kane ka kam, Wat pyrshang ban pynbitar, ban pynbor ne ban kynshoit ïa ka Seng lyngba ki buit thap bad ki jingpyrshang byrngem. Ka Seng ka long kaba la pynkhreh ban ïeng skhem ha ka nongrim jong ka bad ban shim ïa ki sienjam kiba donkam katkum ka jinglong jingman jong ka kam.
Wat kheiñ sting ïa ka Seng da kaba pyrkhat ba lah ban pynsngap ne pynsheptieng ïa ka lyngba ki buit byrngem. Ka Seng ka dei ka Seng kaba don ka nongrim, ka jingkitkhlieh bad ka mynsiem ban ïakhun na ka bynta ka hok jong ki paidbah bad ka bha ka miat jong ka jaitbynriew.
Ka Seng kan ïaineh ha ka jingïeng ryngkat bad ki nongshong shnong jong Daistong, Shnongrim bad baroh ki shnong kiba don bynta ha kane ka kam. Ngi ngeit skhem ba ka rai halor ka lawei jong ki shnong ka dei ban mih na ka jingsngew bad ka mon jong ki nongshong shnong hi, ym ban shah pynbor ne shah pyndik ha kano kano ka rukom, kane ka long katkum ka kyrwoh kaba la phah da u samla Shining Kharbihkhiew Environment Secretary Khasi Students’ Union Central Executive Council.
