Shillong, Naiwieng 09: U President ka Khasi Jaintia Deficit School Association u bah Boswell S. Pala u la pynbna ba kin sdang ia ka jingiakhih ba khlem buh por naduh ka sngi balang ka 11/Naiwieng/2026.
Haba kren ha ki lat pathai khubor ha Shillong Press Club u la ong ba kum ki nonghikai kila hikai ia ki khynnah naduh ba sdang snem bad kaba sah mynta ka long sa tang ka exam bad ki khot ia kane ka jingiakhih kaba khlem buh por naduh ka 11 tarik mynta u bnai.
U la ong ki kiba trei ha skul haba ki khot ia ki jingiakhih haba kim ioh ia kaei kaei kaba ki dei hok ban ioh bad kane ka jingiakhih kam nym ktah ia ka jingtreikam ka skul kum ka jing pynlong ia ka exam ki jingialehkai bad kiwei kiwei bad kam dei ka jingbahkhlieh ka jong ki.
U la ong ba lada don kano kano ka jingktah kam dei ka jingbahkhlieh jong ki hynrei ka dei ka jingbahkhlieh jong kito kiba set ia ka hok ka jong ki bad lada ki ap haduh ban nym ktah ia ki khynnah lehse ki hap ban iakhih ha ka por 1 baje ha ka sngi u blei tip haei kata ka bym lah long.
Kum ki nonghikai ki sngewthuh ba kan don beit ka jingktah hynrei ki dei ban iohi ruh ia kiwei ki jingmyntoi kaba kum ki nonghikai ki dei ban ioh, u la ong ruh ba hato ki khynnah skul kin hun mo ban long nonghikai ha kane ka rukom.
U President u la ong ba ia kine ki mat jingdawa ka dei ba kila iakren na ka por sha ka por hynrei ka dang sahkut haduh mynta bad kane ka dei kaba pyndiaw mynsiem ia ki bad kita ki long kum ka Centralised Provident Fund, ka National Pension Scheme kaba khlem pat pyntreikam ia ka Scheme 2023 bad ia ka Scheme 2026 kaba ki pyrshah namar kam iahap bad kiwei kiwei.
