Shillong, Jymmang 4, 2014: U Bah F. R. Kharkongor, Secretary ba peit ia ka tnat pule puthi jong ka sorkar jylla u ba long ruh u Project Director S.S.A. u la plie ia ka iing skul ba thymmai jong ka Mawrah Shillong Christian Youth Organisation & Conference (SCYO&C) Presbyterian Primary School ha ka shnong Mawrah ka ba don ha ka lynti sha Khatar Shnong bad hap hapoh ka Laitkroh C&RD Block.
Ha kane ka jingialang plie la iadon lang ruh i Kong P. Lyngdoh, District Mission Coordinator SSA, Bah M. Allya, Block Mission Coordinator SSA, Tbn. H. Decruse, Chairman SCYO&C, Bah P.L. Diengdoh, President Managing Committee, Bah M. Marbaniang, Secretary Managing Committee, Bah Habamut Lyngdoh, Secretary Education Committee SCYO&C, u Sordar, ki nongialam shnong, ki dkhot jong ka SCYO&C, ki kmie ki kpa, ki nonghikai ryngkat bad ki khynnah jong ka skul.
u Bah F.R. Kharkongor ha ka jingkren ka jong u, u la iaroh ia ka SCYO&C kaba la shim ia kane ka jingkitkhlieh ban kner ia la ka kti ban sam lang ia ka jingnang jingstad sha ki nongkyndong da kaba seng ia kane ka skul ha kane ka shnong Mawrah. U Bah Kharkongor u ong ba na ka liang ka sorkar bad lyngba ka SSA ka kloi ban iatrei lang bad kino kino ki seng ki ba kloi ban kyntiew ia ka jingnang jingstad.
U la ong ba ka thong ba nyngkong jong ka SSA ka long ban pynioh ia ka jingnang jingstad ia baroh ki khynnah khamtam ha ka kyrdan primary da kaba seng ia ki skul hapoh ki shnong ba ka jingjngai kan long hapoh shi kilometer ia u khynnah ban leit sha skul bad kane kan pynduna ia ka jingpep skul shiteng por jong ki khynnah. Ka thong kaba ar ka long ban pynioh ia ka jingpule ia baroh ki khynnah khlem da pyniapher kynthei ne shynrang bad u la kyntu ia ki kmie ki kpa jong ka shnong Mawrah ban phah ia la ki khun sha kane ka skul ba kin ioh ia ka jingnang jingstad ka ba long u mawjam na ka bynta ka lawei ba phyrnai jong ki khun jong ki bad ka thong kaba lai ka long ban ai ka jinghikai kaba bha naduh ki kyrdan kiba rit khamtam ha ki subject saian bad jingkhein kiba ki khynnah jong ngi ki kham tlot.
U Bah P. L. Diengdoh, President Managing Committee ha ka jingkren jong u, u la pynkynmaw ba ia kane ka skul la seng ha ka snem 1994 da ka SCYO&C, kaba long ka kynhun jong ki 16 tylli ki Jingiaseng Samla jong ki Balang Presbyterian na sor bad khap sor Shillong ha ka jaka ba la ai sngewbha da ka shnong Mawrah. Ha kaba nyngkong ia ka skul la pynlong ha ka iingtin kaba rit ha kaba la don tang iwei i nonghikai bad mynta da ka jingtrei shitom jong ki nongialam jong ka SCYO&C bad da ka jingiarap jong ka Sorkar lyngba ka SSA grant la lah ban pynieng da ka iingmaw bad ki khynnah skul mynta ki la don baroh 65 ngut bad ar ngut ki nonghikai iwei i nongiarap.
U bah Diengdoh ula ai khublei kyrpang ia u sordar bad ki nongialam shnong kiba la kloi ban iasnoh kti lang bad ka SCYO&C ban pyniaid shaphrang ia kane ka skul bad ha ka juh ka por u la kyntu ia ki nongshong shnong ba kin shim kabu ia ka jingdon jong kane ka skul ha kane ka shnong bad kyntu ruh iaki nonghikai bad ki kmie ki kpa ba kin iatrei lang ban wanrah ia ka jingmyntoi ia ki khynnah skul.
Ia ka jingialang la pyniaid da I Tbn. H. Decruse, Chairman SCYO&C bad ki ba ai jingkren ha kane ka sngi ki kynthup ia I Bah H. M. Syiem, General Secretary, SCYO&C, Bah M. Marbaniang, Secretary, Managing Committee nalor kiwei kiwei. La ioh ruh ia ka jingkren ia khublei na i Bah H. Lyngdoh bad la pynphuh pynieng ia kane ka programme da ki jingrwai na ki khynnah jong kane ka skul.(SP News)
