Shillong, jymmang 05 : Da ka jingsngewkhia kaba jur halor ka jingshah iehnoh bein ki paidbah ha ka liang ka koit ka khiah ba ka sorkar kam patiaw satia ia ka jingeh ki paidbah ha Western Ri-Bhoi, ka FKJGP, Western Ri-Bhoi ka la pynpaw syndon ia ka jingpyrshah kaba jur halor ka jingbym lah ka sorkar ban wan rah doctor ha Community Health Centre, Patharkhmah.
U working president ka FKJGP, Western Ri-Bhoi u Bah L. Syngkli u la ong ba kum ka seng ka pynpaw ia ka jingsngewkhia kaba jur ia ka jingshah iehnoh bein ki paidbah ha ka sorkar, namar kat ka kyrdan Community Hall Centre la don tang kawei ka Doctor kaba hap shakri ia ki phew hajar ngut ki paidbah ha ka thain Western Ri-Bhoi.
U la ong ruh kan don jingmyntoi aiu ba ka sorkar kan pynkiew kyrdan ia katei ka jaka sumar pang sha ka kyrdan CHC katba hapoh ka CHC la wan buh tang kawei ka doctor ban shakri ia ki phew hajar ngut ki paidbah ha ka pang ka shitom.
“ Ka seng ka dap da ka jingsngewkhia ba bun ki paidbah ki wan ud sha ka seng halor ka jingduna palat ki doctor ha kaba mynta lei lei ym don doctor satia ha katei ka jaka sumar namar ka doctor ba la buh ban sumar ia kiba pang ruh ka sorkar ka la phah leit training pynban klem da wan buh bujli” la ong u Bah Syngkli.
U la kynthoh ruh da kaba ong kumno tang kawei ka Doctor kan shakri ia ki phew hajar ngut ki paidbah bad nalor kata ruh ka hap ban peit lut ia baroh ki jingdonkam ha katei ka jaka ai jingsumar kaba la buh shisha ia ka jingeh ia katei ka Doctor bad khamtam ia ki paidbah.
Halor kane ka jingbym don doctor tang kawei kat ia ka CHC, ka FKJGP ka la dawa mardor na ka sorkar ba ka dei ban wan rah biang sa kumba ar ngut ki Doctor, khnang bad ka jingdon kham bun ki doctor kan iarap ia ki paidbah ban ioh ia ka jingsumar kaba bit ba biang ha ka pang ka shitom
U la bynrap ruh ba ka seng ka dawa ia ka sokar ba ka dei ban pynthikna ban wan rah doctor biang ha katei ka jaka sumar, hynrei lada ka sorkar kam shim khia ban peit lem ia kane ka jingeh ki paidbah ha ka pang ka shitom kum ka seng ha ryngkat ki paidbah kim banse ban shim noh da kiwei ki lad ba tyngeh, u la bynrap shuh shuh.(SP News)
