Shillong, Iaiong 12: Ki dkhot ka Hynniewtrep National Youth Front (HNYF) ryngkat bad ki nongshong shnong jong ka dong Block-I, kila leit ban iakynduh ia ka Myntri ki kam pohiing ka jylla ka kong Roshan Warjri ha kane ka jingiakynduh ki la dawa ba ka sorkar ka dei ban buh ia ka Police Outpost ha ki 5 tylli ki shnong kiba don ha katei ka thain.
Ha kane ka jingiakynduh bad ka sorkar la dawa ba dei ban buh mardor ia ki Police Outpost ha ki 5 tylli ki shnong kiba don ha katei ka thain kaba don hapdeng ka jingiakajia pud bad ka Assam na ka bynta ban wanrah ia ka shongsuk shongshngain jong ki paidbah namar ba kila mad ia kiba bun ki jingshah thombor ha ka jylla Assam” la ong u President ka HNYF Raliang Circle u Donbok Dkhar haba iakren ha ki nongthoh khubor.
U bah Dkhar ula ong ruh ba ka sorkar kadei ban buh ia ki Police Outpost ha ka shnong Mukroh, Saba, Psiar, Khanduli bad Umkyrpong namar ba ka sorkar Assam ka wan ban pyndik bad thombor man la ka por ia ki paidbah kiba shong ha kitei ki shnong kiba hap hapoh ka ri lum Jaintia.
Shuh shuh ula iathuh ba ha ka 8 tarik mynta u bnai, ki ophisar ka tnad Forest jong ka Assam kila pynlong ia ka jingjurip bad kila lum ia ka pisa na ki paidbah kiba dei ki nongrep bad kila dep ruh ban shim jingkhein khanasamari ia ki 15 tylli ki longing kiba don hapoh shnong Mukroh.
U bah Dkhar ula iathuh ruh ba ka Kong Warjri kala kular ban jurip ia katei ka thain hadien ba la kut ka dorbar mang tyngka bad kala kular ruh ban khmih bniah halor ki jingdawa kiba ka seng kala buh.
Kane ka dorkhas kaba la ai sha ka ka sorkar kan dei ka sien kaba khatduh watla 42 snem kynthih kila dawa ia kane ka juh lada ka sorkar kam leh ei ei sha kane ka kynti kaba mynta kim ban se ban pynlng da ka jingiaid paidbah sha secretariat ban pynbor ia ka sorkar ba ka dei ban sngap ia ka jingdawa ka jong ki.(SP News)
