Shillong, Nailar 31: ka kynhun shipai suin jong ka Ri India ia kaba la tip kum ka “Indian Air Force” mynta ar sngi kala pyndon kam da ki helikopter ban pynlait im ia ki briew kiba la sah kut ha ka dewlynnong Jampani, ha ka wah Siang jong ka jylla Arunachal Pradesh.
Ki shipai suin kila leh ia kane ka kam ha dien ba ka sorkar jylla kala pan ia ka jingiarap jong ki shipai suin ha ka sngi palei jan miet 30/8/2018. Ka kynhun shipai IAF kala phah ia ka Mi-17 helicopter na ka station jong ka kaba don ha Mohanbari jong ka jylla Assam.
Baroh ki briew kiba la shah kut ha dewlynnong Jampani kaba don ha ka wah Siang baroh ki long 19 ngut, na kine ki khynnah ki don 6 ngut. Ia ki la pynlait da kaba shu rah ia ki da u tyllai na ka jaka ba shlei um sha kawei pat ka jaka. Ka jingleit sei ia kine ki briew da ki helikopter la leh mynta ka sngi dang step.
