Guwahati, Jymmang 10: Mynta ka sngi ka Krisak Mukti Sangram Samity,(KMSS) ka la pynlong ia ka jingialang paidbah ha kanongbah Guwahati ban pyrshah ia ka sorkar jylla kaba la ialam da u Tarun Gogoi kaba la ailad ia ki heh spah ban klum ia ki jaka jong ki trai shnong ha sawdong jong ka sor Guwahati ha ka kyrteng jong ki karkhana, la kynnoh u nongialam katei ka seng u Akhil Gogoi.
Ha kane ka jingialang paidbah kaba la long ha khmat jong u DC Court ha Guwahati na ka liangjong u nongialam ka KMSS la kynnoh ba ka sorkar Assam ka la dei 280 Bighas ka khyndew sha ki heh spah ha ka dor kaba tang T.15000 shi Bighas. Kane ka jingialeh klop iaki jaka naka bynta ban biang mano re ka la kot sha ka T.1000 klur la kynnoh.
Ha kane ka jingialang paidbah la kdew kti iaki lai ngut ki heh psah jong katei ka jylla, ha kaba u wei u la thied 280 Bighas , u wei 5000 Bighas bad u wei u la thied 4000 Bighas bad kita ki lai ngut kiba u Akhil Gogoi u la kdew ki long Kailash Lohia, Suresh Pithani and Ramavatar Bhurakia.
Ha kane jingialang paidbah ha kaba daki phew hajar ngut ki briew ki la ia poi ban ai ka jingkyrshan ia ka KMSS la dawa ba dei ban phah tohkit ha ka CBI ban sei madan ia ki jinghshisha baroh. Ka long kaba sngewlyngoh haba paidbah ki pan patta na ka bynta ka khyndew jong ki ym shym la ai da ka sorkar katba na ka bynta ki heh psah la ai pat ha ka dor kaba tad, la kynnoh.(SP News)
