Shillong, Risaw 11: Ka kynhun ki riew stad ka tnad ba dei peit ia u dewiong jong ka sorkar pdeng ryngkat bad ka kynhun na ka Central Mine Planning bad Design Institute Limited (CMPDIL) bad na ka Directorate General of Mines Safety (DGMS), kila leit ban jurip ia ki par deiong ha East Jaintia Hills bad Khasi Hills ha kane ka taiew kaba la dep.
Ha kane ka jingwan jurip la don lang ki heh ka sorkar jylla na ka tnad ba dei peit ia ki marpohkhyndew, kane ka jingleit jurip ka long na ka jingiai bteng u myntri rangbah ka jylla u Conrad K Sangma ia ka jingiakren bad u myntri ka sorkar pdeng ba dei peit ia ka kam dewiong namar ka jingkhang tih dewiong kala sagneh naduh ba khang ka National Green Tribunal.
U Myntri rangbah ka jylla u Conrad K. Sangma, u la ai kynduh ia u myntri ka sorkar pdeng ba dei peit ia ka tnad kam dewiong u G. Kishan Reddy, ha nongbah Delhi ha ka 7/Naitung/2026 bad ka tnad sorkar pdeng ba die ia u dewiong kila wan sha kane ka jylla ban jurip ban sngewthuh.
U Myntri Rangbah ka jylla u la shim khia ia kane namar kala ai jingkyrshan ia shibun ki long iing ha ka jylla, ha ka juh ka por dei ban bud ia ki kyndon ban pynneh ia ka mariang, ha kane ka jingleit kila bishar bniah ia ka jigntih dewiong ha EJH District bad Khasi Hills.
Ban peit la ka jingtih dewiong kan long kaba katkum kane ka juk stad saian bad ha ka juh ka por ba kan ia hap bad ki kyndon ka ain kiba la don ha kane ka jingwan jurip kila pynlong ruh ia ka jingialang bad ki ophisar ka tnad marpoh khyndew ka jylla.
Ka jingiakren ha ka jingialang ka long ban sngewthuh ia ka jingeh ki trai par, ka jinpyndon kam ia kor ki bor kane ka juk stad saian, ban iada ia ka mariang bad ka jinglong jingman ka khyndew bad ka rukom bat khyndew ha kane ka jylla, kane ka long ban sngewthuh kumno ban iaid sha khmat.
U Myntri rangbah ka jylla u la ong ba ka sorkar kala wat ia ki lat ki lynti ba kumno ban ioh ban plie biang ia ka jingtih dewiong ha ka jylla ka sorkar jylla ka ai khublei ia ki heh jong ka tnad ba peit ia ka kam dewiong ka sorkar pdeng, ka CMPDIL bad DGMS ba kila wan ban jurip ia ki par dewiong ha jylla.
