Shillong Risaw 11: U President ka Voice of the People Party (VPP) u bah Ardent Miller Basaiawmoit ula ong ba kam trai ba ka shuki MP ha kane ka ilekshon shiteng samoi, kan wanphai biang sha ka VPP.
Haba kren ha ka jingialang kitbok kitrwiang ia u kyrtong ka party ba long ha Polo, u bah Ardent ula kam ba um don ka jingartatien ia kane ka ilekshon bad ka jingjop kan wan sha u kyrtong ka VPP u bah Batskhem Myrboh.
Ula ong ba ka party hadien u Dr. Ricky AJ Syngkon (Bam kwai ha Dwat u Blei), mynta ka kane ka kynti ka la lah ban sei biang sa ia u kyrtong uba dei u khlur bad u riewstad, uba ki paidbah kilah ban shaniah.
U bah Ardent ula pynkynmaw ba ha ki 54 tylli ki snem hadien ba la ioh ia la ka jylla, ki riew tymmen kiba don bynta ban iakhih iaksar ban pynioh ia la ka jong ka jylla kila iakhun tyngeh haduh ba ka sorkar India ka hap ban sngap. Hynrei mynta pat ki MLA ki Myntri sorkar kiba u paidbah ula jied, la shah khyrwait shabi da ki ophisar kiba na shabar ka jylla.
Ha kajuh ka por, ula ong ba ka long kaba sngewlehrain ba kawei hadien kawei ka party seng trai ri kan khyllem ha ki seng kiba na Delhi. Hynrei ia ka VPP wat pyrshang ban pynkhyllem da wan sa ka bor nangno nangno kin ym lah ban pynkhyllem ia ki nongrim ka party.
“Ki paidbah kim kwah ba ka VPP kan im tang 5 snem ne 10/20 snem, hynrei ki kwah ba kane ka party kaba don ia ka thong kan iaineh haduh ka por jong ki khun ki ksiew,” ong u bah Ardent bad bynrap, “Kiba iakhih nyngkong ban pynioh ia ka jylla kaba pura, kidei kita ki seng trai ri ne ki seng riewlum. Hynrei sngewsih ban ong ba kita ki party kiba u paidbah ula ai ka jingshaniah ha ki 54 snem mynshwa, kim lah shuh ban neh tang ha kine ki por mynta ruh.”
Shuh shuh u bah Ardent ula ong ba ka VPP kam iawer kulmar ia ki nongialam, namar ynda kila ioh ia ka bor ki kynnoh ia u paidbah bad ki shet shukor shet kylla noh da kaba phet party noh shane shatai bad iatreilang noh ka BJP, Congress.
“Ki nongialam ka VPP ki hun ia ka rai u paidbah. Haba u paidbah u sngewthuh ba tang ha ki 4 tylli ki konstwiensi ban pyllong MLA iangi, ngi hun bad ngi iaineh bad iaitrei ban wanrah biang ka jingshaniah jong u paidbah,” ula ong.
Ula ong ba ka VPP ka don 4 ngut ki MLA, 26 ngut ki MDC, uwei u MP bad mynta ka kynti ruh khlem ka jingartatien ula kam ba ka shuki MP kan wan biang sha ka VPP. “ Ngam don jingartatien bad nga kam trai ba ka jingjop kan wan sha ka VPP,” ong u bah Ardent.
Ha kajuh ka por, ula ther ia uwei u nongialam uba don ha ka sorkar, uba la pyrshang ban pynsngewthuh bakla ia ki paidbah ban tei pop ia ka VPP ba kam shym la leh eiei watla ka la don 4 ngut ki MLA.
U bah Ardent ula ong ba ka VPP ha KHADC ka la knieh ia ka bor synshar ha kaba ka la ioh 17 ngut ki MDC bad kumjuh ha u 2028 kan knieh ia ka bor synshar bad ka la buh thong ba kan ioh 32 ngut ki MLA.
“Namarkata ngi la buh thong ba ha u 2028 ngin ioh 32 na ka 36 bad ngin knieh ia ka bor synshar kumba long ha District Council. Ka EC ka VPP ha KHADC ka trei laitluid, khlem don kino kino ki jingpynwit, namar ka khlem iatrei synrop badno badno ruh,” ula ong.
