Shillong, Naitung 03: U Bah Prestone Tynsong Deputy Chief Minister ka jylla, u la ong ba ka iing bishar kaba ha khliehduh jong ka Ri, ka Supreme Court Mynta ka sngi kala ai ia ka rai ban pynthikna ba ka khyndew bad ki marpoh khyndew ha kane ka jylla Meghalaya ka dei ka jong u paidbah.
Ha ka juh ka por la iathuh ba ka Supreme Court mynta ka sngi kala weng ia ka rai jong ka National Green Tribunal (NGT) halor ka jingkhang tih dewiong ha ka jylla, ha ka juh ka por la bethah ban bud ia ka MMDR, Act 1957.
Da kane ka rai ka long ba ki trai jaka kiba don ia ki marpoh khyndew, naduh u dewiong Mawshun badkiwei kiwei ki hap ban shna ia ka Mining Plan bad phah sha ka sorkar bad ka sorkar kan phah sha ka sorkar pdeng ban ioh ia ka Mining License.
La leh ia kane ka long ban pynthikna ba kan nym ktah ia ka mariang bad ha ka juh ka por ba ki nongtrei ha ki par dewiong kin ioh ia ka jingshngian. Haba ia dei bad kane ka sorkar kala dep shim ia ki ar tylli ki kompeni jong ka sorkar pdeng ka CMPDIL bad ia ka MECL ba kin shna ia ki mining plan, namar ha kane ka jylla hap ban tih dewiong kum ba long mynshuwa.
Laithuh ruh ba ka iing bishar kaba ha khlieh duh jong ka Ri mynta ka sngi kala hukum ruh ba baroh u dewiong ba dang sah 37 lak Metrik tone kan shimti noh ia ka Coal India Limited ban die ia ia u Dewiong ba dang sah bad ia ka pisa kan thep sha ka sorkar jylla.
Na ka liang jong u Bah Tynsong u ka kynnoh ba ka sorkar mynshuwa hapoh ka jingialam jong u Dr Mukul kam shym la leh ei ei ha kaba ia dei bad kane ka jingkhang tih dewiong, hynrei kaei kaba u leh ka long ban phah sha ka MMDC ia kaba ki paidbah kim pdiang.
Haba ia dei bad ka jingdain kuna T.100 klur da ka NGT ia ka sorkar jylla, la bethah ia ka sorkar jylla ba kan sei ia ka pisa kaba la lum hapoh jong ka Meghalaya Reclamation Fund (MRF) bad ka pisa ka don mynta palat ia ka T.400 klur tyngka.
Ia kane ka pisa T.100 klur yn ai sha ka Central Pollution Board bad kan phah sha ka sorkar jylla na ka bynta ban pynwan dur biang ia kito ki jaka kiba la shah pynjop ha ka jingtih dewiong mynshuwa.
Bah Tynsong u la ong ba ka jingduh jong ka sorkar man u snem na kane ka jingkhang tih dewiong ka long T.600 klur tyngka. Kane ka jingduh ka long naduh u snem 2014 haduh mynta 2019 bad kane kala ktah ia ka mang tyngka jong ka sorkar jylla.
