Shillong, Jymmang 26: U Bah John F Kharshiing u ba dei u nongialam jong ka kynhin ki khlieh nongsynshar ha kane ka jylla Meghalaya u la thoh sha u myntri rangbah ka jylla u Dr Mukul Sangma ban ong ia ka sorkar jylla ba ka dei ban ia kren bad ka sorkar jylla ban pynioh ia ka Council kaba khklem don liang ha kane ka jylla Meghalaya.
Ia kane ka shithi sha u Dr Mukul Sangma, Chief Minister la phah ha ka 24 tarik May 2013, kynthup ruh ki shithi kiba kongsan – na ka tnad MHA, POL-GoM, bad na ka NHRC, ha kaba la kyrpad jur ia ka Sorkar Jylla, ban shim khia ban pynsngew sha ka Sorkar India halor ka jingdonkam ban ioh ‘ka Council kaba kyrpang kaba khlem Party (lane khlem ki seng sain pynthei)’ na ka bynta ki Nongsynshar naduh Shnong, Raid haduh Hima kiba don hapoh ka jylla Meghalaya, katkum ki kyndon jong ka dulir Instrument of Accession and Annexed Agreement kaba la pdiang bad soi da ka Sorkar India bad ki 25 Khasi States ha 17 tarik August 1948
Kane ka kam ka la nang khih hadien ka jing leit iakynduh ka kynhun ki Khlieh Nongsynshar Khasi Garo bad Jaintia, (Grand Council of Chiefs of Meghalaya – kaba kynthup ia Federation of Khasi States, Ka Dorbar Ki Dolloi, Ki Sirdarship, bad Council of Nokmas), ha ka 7, 8, bad 9 tarik u bnai June, 2012, ha New Delhi, ha kaba la ia kynduh ia u Shri. V. Kishore Chandra Deo, Union Minister for Tribal Affairs, Govt of India, ka Smt. Sonia Gandhi, Chairperson, UPA, bad National Advisory Council (NAC) bad ia u Shri. M. Venkaia Naidu, MP & Chairman, Parliamentary Standing Committee on Home Affairs, kiba la bthah ia ka Ministry of Home Affairs ban khmih ia kine ki jingujor na ka liang ka Grand Council of Chiefs of Meghalaya.
Lah ban pynkynmaw ba ka tnad Sorkar India ka National Commission for Tribal Affairs, Govt of India, ka bor kaba ha Khlieh duh kaba dei peit ia ki jingeh jong ki riewlum, hadien ka jingbishar kaba bun, ha ka 26 tarik April 2012, ka la pynmih ia ka jingbtheh / hukum ha ka tnad Ministry for Tribal Affairs ba kan khmih peit bad pyndep ia ki jingkular kiba dang sah kumba la ia kut ha ka Instrument of Accession and Annexed Agreement of 17 August 1948.
Kumjuh ruh ka tnad National Commission for Human Rights,(NHRC), Sorkar India lyngba ka shithi kaba 16 June 2012, hadien ka jing bishar ia ka jingujor na ka liang ki Hima Khasi States, Federation of Khasi States, ki la pynpaw shai ba ia kitei ki kam bad ki jingiateh kiba dang sah teng ‘ki long ki kam kiba ka Parliament ka lah ban tuklar bad pyndep, bad la bthah ia kitei ki nongujor ban ia kren iakynduh bad ki bor Sorkar India ban pynbeit ia kitei ki kam kiba dang sah teng’.
La bah ong ba wat hadieng 66 snem ym pat don kano kano ka jingkhot na ka liang ki bor Sorkar India ban ia kren pynbeit bad ban pyndep hok ia kitei ki jingiateh bad ki jingkular bad ka Federation of Khasi States, kiba la iai pynpaw ia ki jingdawa lyngba ka rai kiba la shim na ka por sha ka por ha ki Dorbar Ri kiba la lum da ka Grand Council of Chiefs bad ka Federation of Khasi States.
Halor kitei ki kam ka Dorbar Ki Khlieh Nongsynshar ka Ri Hynniewtrep, Federation of Khasi State, Ka Dorbar Ki Dolloi, Ki Sirdarship, kan ia kynduh ha ka 4 tarik June ha ka por 11 baje mynstep, ha lumjingsuk, Demthring, Shillong ban ia kren halor ki tei ki shithi, bad kiwei kiwei ki kam. (SP News)
