Shillong, Naiwieng 05: U Myntri ka tnad jngoh kai pyrthei u bah Paul Lyngdoh u la ong ba ka jingtrei ia ka Shillong Peak Ropeway Project kan dang iaid shakhmat ha kajuh ka por ka jingiakren ruh kan dang iaid bad na ka liang ka kompeni kala dep ban applai ia ka Trading License ha ka 18/Jymmang/2026 bad kane ka dang don ha ka jingpeit jong ka KHADC.
U bah Paul u la ong ba kane ka dei ka skhim jong ka sorkar jylla bad ka jingapplai ia ka Trading License ka long ban bud ia ki kyndon ban pan ia ka license,bad khmih lynti shen ba ka KHADC kan sa ai ia ka Trading License, ka jingpynpait ia ki tala kiba la khang da ka District Council ki iing ki sem ki dei ki jong ka sorkar jylla kaba hap hapoh jong ka tnad khlaw.
U Myntri ka tnad jngoh kai pyrthei u la ong ba ia mynta ka dang long tang ka jingpynkhreh ban pyntrei ia ka Ropeway bad khmih lynti kin sa ioh ia ka Trading License ha kajuh ka por kin dang iakren bad ki kynhun bapher bapher bad u kyntu ba kin wan shakhmat ba kin iakren bad ka sorkar.
U Myntri u la ong ba kan kham don jingmut lada ki wan ban iakren ban ia kaba hylla kiw kiw kaw kaw, wan sha khmat sha ka miej ka jingiakren bad la ong lada ym lah ban pynbeit ha ka kyrdan jong ka Director kin sa ia peit.
U Myntri ka tnad jngoh kai pyrthei u la ong ba ym lah lait namar ka elekshon ka long satang shi snem kumta kiba pyrshah kin ialeh ban wanrah ia ki jingkynnoh ba ka sorkar MDA kala kular shibun hynrei kam shym la lah ban pynurlong, hynrei kaei kaba u myntri u kwah ban pynsngew sha ki paidbah ba lada ia pyrshah ia ki kam pynroi kan long kaba eh ia ki briew ba kin wan seng kam sha kane ka jylla la ka dei ka sorkar India ne ki riew shimet.
U bah Paul u la ong ba kane ka project kam dei kaba dang shu long mynta dang shi bnai ne tam hynrei kala rung ha ka jingmut jingpyrkhat ka sorkar naduh ki snem 1980 bad dei ha u snem 2022 kala sdang ban iohi ba kane ka skhim kan urlong hynrei kaba pynlyngngoh ka long hadien saw snem mih ki jingpyrshah wat la ka sorkar kala ioh lut ia baroh ki jingmynjur na ka sorkar pdeng, ki shipai suin, ki shipai khyndew na ka Riat Laban bad ia kane ka Ropeway la buh maw nongrim ruh da ka President jong ka ri India.
