Shillong, Naiwieng 05: U Deputy Commissioner ka Ri Bhoi District u la plie paidbah ia ka ‘Filo Apps’ bad mynta kala don ha ka rynsan Social Media ha ki kynhun WhatsApp jong ki samla ka Ri Bhoi District.
Ki samla pule napoh ka Ri Bhoi District kila ioh ban shong klass lyngba ka jinghikai napoh ka apps Filo bad lyngba ka WhatsApp Group bad ban pynkhreh ialade ban thoh ia ki exam bapher bapher kiba kynthup ia ka DSC, MPSC, SSC, MTET ka Banking lem bad kiwei kiwei ki Competitive Exam.
Ha ka sngi balang ka 04/Naiwieng/2026 na ka liang ka ophis jong u Deputy Commissioner ka Ri Bhoi District kala pynlong ia ka jingaikhusnam bad ka jingsam ia ki syrnot sha ki 24 ngut ki samla kiba la iohkam lyngba ka Filo Apps bad ka WhatsApp Group jong ka Filo.
Kum ban shu kdew khyndiat ba kine ki 24 ngut ki samla kiba ioh syrnot ha ka sngi balang ki dei kiba la dep ban pass ia ka Exam kam ka jong ki ha ki tnat bapher bapher kum ka SSC ka MTET lem bad kiwei ki jaitkam.
Ia kane ka jingaikhusnam bad ka jingsam ia ki syrnot la pynlong hapoh ka ophis treikam jong u Deputy Commissioner ka Ri Bhoi District ha ka jingdonlang u Deputy Commissioner u Dr. Abhishek Saini.
Haba ai jingkren na ka liang u Deputy Commissioner ka Ri Bhoi District u la ong ba na ka liang ka ophis jong u DC u kwah ba ki samla pule na ka thain nongkyndong kim dei ban sahdien ha ka pule puthi bad ha ka ioh kam ioh jam.
Bad shuh shuh u la ong ba lada ki khynnah pule klass 9 haduh klass 12 lada ki don kano kano ka jingeh ki lah ban peit lyngba ka apps Filo ba kin ioh ia ka jingtip kaba kham bniah la ka dei ha ka subject Science ne Mathematics bad kiwei kiwei ki subject.
