Shillong, Naiwieng 5: Mynta ka sngi, u Myntri Rangbah ka jylla Meghalaya, u Conrad K Sangma, u la leit sha West Jaintia Hills bad buh maw nongrim ia bun tylli ki projek pynroi katba u la plie pyrda ruh kumjuh iaki katto katne ki projek ba la pyndep ha kane ka thain. Ha katei ka sngi, la don u Symbud Myntri, u Sniawbhalang Dhar bad u Myntri ka koit ka khiah, u Wailadmiki Shylla.
Ha katei ka sngi plie iaka Block Integrated Development Complex jong ka Thadlaskein C&RD Block, la don ka jingai jingkren kaba la don bynta lang ban plie da ka Kwit Sari, Community Stewardship bad Raij Leader, u Myntri Rangbah, u Conrad K Sangma, kiba la ong ba ka kam pynroi kaba lai paia jong ka sorkar ka pynleit bhah khamtam ha kaba kyntiew iaki mar bad ki jingtei kiba long ka nongrim jong ka jingroi, ryngkat bad ka jingiarap kaba beit sha ki dkhot longiing bad ki rynsan ialehkai ha kaba ka jingbei tyngka ha ka bynta jong ka jingialehkai kala kot sha ka 70% ha ki snem ba la dep.
Kane ka long ban kyntiew ia ki khun samla bad ban pynbiang ki rynsan ialehkai kiba khraw. U la pyntip ruh ba ki kam pynroi ki thmu ban ktah iaka jingim jong uwei pa uwei u briew lyngba ka jingioh jingmyntoi shimet kaba kane ka dei kata ka paia ba ar jong ka sorkar, u la ong ba ka sorkar kala dep bei tyngka haduh T. 400 klur sha ki samla pule lyngba ki prokram halor ka scholarship bapher bapher bad kyrshan na ka bynta ki SHG kala kiew na ka T. 50 klur sha kumba T. 1400 klur bad ki nongrep kila dep pdiang haduh T. 300 klur lyngba ki prokram bapher bapher kum ka FOCUS+, CM Assure bad kiwei kiwei.
Katba ha ka paia ba lai jong ka sorkar kaba dei shaphang ka jingpyn neh pynsah iaka kolshor bad riti dustur, u la ong ba ka sorkar ka buh nyngkong ban iada iaka jinglong tynrai da kaba kyrshan iaki riti ki dustur ba bun rukom jong ka imlang sahlang, khlem da khein iaka niam ne ka thain.
Kham katto katne, u Conrad u la dep buh maw nongrim iaka Integrated Hospital, Ummulong u la leit jurip ruh iaka iew ha Iawmusiang Shopping Complex bad ka Thadlaskein Hospitality Complex bad plie pyrda iaka Shooting Range ha Khliehtyrchi.
Ha kane ka sngi, u Conrad u la plie ruh iaka surok ba dang dep shna pynbha ha Ialong, Jowai, Madur Thymme, Mukhla bad Niriang kiba hap hapoh ka
Under EE, PWD (Roads), Jowai South Division, West Jaintia Hills District ha kaba ka jingjngai ka don 38.163 kilometre bad buh maw nongrim na ka bynta ban pynthymmai kynthup iaka jingsiang surok bad kiwei kiwei iaka surok ha Sabah Muswang ba jngai kumba 2.450 kilometre kaba hap hapoh ka RIDF- XXX, katba ka jingpyn bha iaka surok ka kynthup iaka jingsiang surok ha Khliehtyrshi ba jngai kumba 4.085 kilometre hapoh ka RIDF-XXXI bad ka jingshna iaka jingker sainar jong ka Thomas Jones Synod College, Jowai.
