Shillong, Naiwieng 03: ka Environment Committee jong ka iing dorbar thaw ain ka jylla mynta ka sngi kala leit sha Nongbah Jynrin ha ka ja ka ba don ki top ba buh ia ki jaboh Uranium ha SWKHD ban leit jurip ia ka jingiew ka radiation ha katei ka thain.
Ha katei ka jingialang kaba la khot pynlong da katei ka Committee hapoh ka shnong Wahkaji la wan ban iashim bynta lang ruh da ki nongialam shnong jong ki 8 tylli ki shnong ha katei ka thain, ki nongialam Sengbhalang bad kumjuh ki ophisar napoh ka District.
Na ka liang jong ka Committee ha katei ka sngi kala ailad ia ki nongialam shnong bad kumjuh ki Sengbhalang ba kin pynsngew halor katei ka mat ha kaba kiba bun hi kila pynpaw ha kaba la iashim bynta ban ai jingkren da ki nongialam shnong jong kitei ki 8 tylli ki shnong ha ryngka ki nongialam Sengbhalang ba kynthup ia ka Seng KSU, FKJGP, HYC bad HANM.
Ki nongkren na ki nongialam shnong khambun hi ba kila pynpaw ba kala long shisha kumba la paw ha ki lad pathai khubor bad kadon shisha ka jingorpait ka dam pynlang jaboh uranium ha Nongbah Jynrin ha kaba kala buh jingma ia ki paidbah namar ka jingkiew jong ka radiation hynrei don ruh ki nongialam shnong kiba pyrshang ban ong ba ka jingbatai ia kata ka jingkiew ne jinghiar ka radiation kam long kaba lah ban shu pdiang namar namar ym lah ban pynshisha.
Ka sur kaba mih na katei ka jingialang ka long beit ba ka sorkar kadei ban thung da ka kynhun kaba laitluid na ka bynta ban wad bniah halor katei ka jingorpait ka jaka pynlang uranium ha Nongbah Jynrin bad ruh ban wad bniah ia ka jingkiew jong ka radiation bad ia ka koit ka khiah jong ki paidbah nongshong shnong katei ka thain.
Haba pyrshang ban kylli ba balei ka Commiittee kam leit hi ban jurip sha Nongbah Jynrin na ka liang jong u bah S.K Sunn u la ong ba ka Committee kala phiah ar kynhun kata kawei ka kynhun ban iakynduh ia ki paidbah ha Wahkaji katba kawei pat ka kynhun ka ban leit sha Nongbah Jynrin ha ryngkat ki briew AMD ban jurip ia ka jinglong jingman bad ban leh ruh ia ka jingthew.
Shuh shuh u la ong ruh ba hadien bala ioh ia ka kaiphod na ka liang jong ka Commiittee kan sa shong pyrkhat lang bad baroh ki dkhot bad ban bishar ia kaei kaba ka committee kadei ban leh ia kaba kan sap hah ruh sha ka sorkar.
Ha kaba iadei bad ki jingpynsngew halor ka koit ka khiah jong ki paidbah ka thain na ka liang jong u bah S. K Sunn u la ong ba ka Committee kala wanialam ruh ia ki Doctor ba kin sngap bad ngeit ba ma ki ruh kin sa rah ia kaei kaba ki paidbah kila pynsngew shapoh ka Department ka jong ki.
Ka commiittte kan sa rah ruh ia kane hapoh ka iing dorbar thaw ain ka ban sa long shen, la ong u bah S K Sunn chairman ka committee jong ka environment jong ka iing dorbar thaw ain ka jyllajylla.
Ha kane ka jingialang la don langruh ki wei ki wei ki MLA kiba dei na ka committee. U bah Kimfa S Marbaniang, bah Pious Marwei ba dei ruh MLA jong katei ka ja ka, bah Himalaya Shangpliang, bah George B Lyndoh bad la don lang ki ophisar na SWKH District.
