Shillong, Iaiong 20: Ka jylla Meghalaya haduh mynta ka don 46 tylli ki Community and Rural Development Block bad ia ka skhim NERGS la pyntrei lyngba ki block ha baroh kawei ka jylla bad kane kala long jingmyntoi sha ki nongkyndong ha ka liang ki kam pynroi.
Haduh mynta na ki 46 tylli ki Block, kiba la pyntrei kam ia ka “Direct Benefit Transfer” ki lontg tang 20 tylli bad na ka liang ka tnad pynroi nongkyndong ka jylla kala ialeh ban pynkhreh ba ia ka DBT yn pyntrei kam noh ha baroh ki block hapoh une u snem mang tyngka kaba mynta.
Haba ia kren bad u SP News Agency u Director ka tnad pynroi nongkyndong u Sibhi C Sadhu u la iathuh ba ka tnad pynroi nongkyndong ka kwah ban pyntrei kam noh ia ka DBT ha baroh ki Block ha kane ka jylla khnang ba ia ka bai trei sngi yn siew beit sha ki akount jong ki briew.
La iathuh ba mynta ka tnad pynroi nongkyndong ka dang shim ia ka jingkhein namar ka jingeh kaba ka tnad pynroi nongkyndong ka ia kynduh ka dei na ka daw jong ka jingduna ki bank ha kane ka jylla dei na kane ka daw ba mynta ki dang peit bniah ia kane ka bynta kumno ban leh ban sdang noh ia ka jingpyntrei kam ia ka DBT ha baroh ki Block.
Na ka liang jong ka tnad pynroi nongkyndong ka dang ialeh mynta ban pynbit pynbiang ha kaba ia dei bad ka jingpynkhreh ban pyntrei kam noh ia ka DBT ha baroh ki 46 tylli ki block ha ka jylla, kiba dang shah mynta ban pyntrei kam ia ka DBT ka long ha ki 26 tylli ki block.
