Shillong, Jymmang 14: Namar ka jingkiew sted kynsan jong ka khlam ka ngoh, Covid-19, ha kine ki khyndiat sngi mynta, arngut na ki dkhot ka Kynhun U Tymmen U San ryngkat bad U Shongknor ka Kynhun U Lum Sohpetbneng jong Ka Seng Khasi Kmie, Mawkhar, Shillong, ki la kiew sha Lumsohpetbneng ba kyntang ban pynlong ïa ka nguh Blei, dem Blei.
Kane ka jingpynlong ia kane ka jingduwai phirat ka long, ha ryngkat ka khnong, ka bishar ba Un ri, Un da, Un ker ïa ngi lang baroh na kane ka khlam ka ngoh bad ba kane ka jingpang kan duh kan dam bad jah noh sha ka rngai.
Ha kum kine ki por ba u khun bynriew ka pyrthei baroh kawei u don hapdeng ka jingtynjuh bad jingialeh ban ïada ïalade na ka khlam ka ngoh ba shyrkhei, na ka liang jong ka Seng Khasi Kmie, ka buh ruh ka kyntu, ka kynpham ïa baroh ki kur ki kha bad ki para bynriew baroh bad kin long kiba phikir bad sumar ïalade.
Kane ka jingsumar ia lade ka long da kaba bud ryntih ïa baroh ki adong adit kumba la bthah da ka tnat ka koit ka khiah, khnang ba ka khlam ka ngoh kan nym ioh lynti ban saphriang bad pynjynjar ïa ngi. Ka ktien tymmen ka ong, “U Blei U Iarap ïa kito kiba ïarap shwa ïa lade”.
