Shillong, Naitung 23: Mynba 73 snem mynshuwa u Myntri Kam Pohiing (Ministry of States- kyrteng ka tnad ha shwa u snem 1950 ) uba nyngkong ka Ri India u Sardar Vallabhbhai Patel u la wan sha ki lum baieid jong ngi ka Ri Khasi ha ka 1tarik bad 2tarik January 1948.U Myntri kam poh iing u ba nungkong jong ka Ri India u da wan khnang ban wad jingshai halor ka synshar Khadar hapoh Ri Khasi.
U la ia kynduh kyrpang ia ki Syiem, Lyngdoh, Sirdar bad Wahadar ban ia kren halor ka jingbymtreh ki Khlieh Nongsynshar ka Ri Khasi ban ia soi ka dulir ia soh pura ka dulir (Instrument of Merger) bad ka Ri India namar ki mynjur ban soi tang ia ka dulir Instrument of Accession ha ryngkat ki kyndon Annexed Agreement ka ban neh ar snem.
Hadien kane la shimti da u Lat jylla Assam ha ki snem 1947, 1948 bad 1949 ban bteng ia ki jingiakren bad ki khlieh Nongsynshar. Kumta wat hadien 73 snem naduh ka 1 tarik January 1948 – 24 July 2021 kumba ka paw ka jingwan u Myntri Kam Pohiing ki kam ki dang iai sah teng ka jingiakren jingia pynbeit ia ki kyndon dulir Instrument of Accession ha ryngkat ki kyndon Annexed Agreement.
Kane ka jingiatehkular ba la mynjur bad soi da u Governor General of India, u Shri. C Rajagopalachari, bad ki arphewsan Hima Khasi States ka Federation of Khasi States ha ka 17 tarik August 1948, kata shisnem hadien ka jingioh jinglaitluid ka Ri India ki dang sah teng haduh kine ki sngi.
Ka Federation of Khasi States, ha kine ki snem ki la thoh bun sien bun bun snem bad ia kynduh markhmat bad ka Ministry of Home Affairs, Sorkar India, ha Delhi. Ka Synjuk ki Khlieh Nongsynshar ki la ia kynduh markhmat ia ki Prime Minister barim haduh lai sien.
La thoh bad ia kynduh ia u President India ha u snem 2013 ha Shillong, la ioh ai ki dorkhast haduh lai sien bad ia ioh ai ka jingthoh markhmat da u Paiem Phrester Manik Syiemlieh, Syiem Hima Nongkhlaw, ia u Prime Minister ba mynta ha ka 28 May 2016 hakhmat ka law kyntang ha Mawphlang.
Kumba ka long mynta la dap bun duli, bun synduk ki kot ki memorandum, bad la ioh ka jubap na ki tnad Sorkar, na Parliament, na ka Ministry of Home Affairs, Sorkar India, na ka National Commission for Scheduled Tribes (NCST) April 2012, na ka National Human Rights Commission(Law Division), 2012, kiba la pan jingshai na ka Sorkar Jylla Meghalaya bad na ka Ministry of Home Affairs.
Kane ka jingpan jingpynshai ka long naduh u snem 2002, 2012, 2014, 2015 bad 2016 ter ter. Kaba Lyngoh ka long ba ynda poi shane ki bor ADC bad Sorkar Jylla ki la shim sting ban jubap lane ban ai jingshai kaba biang sha ka Sorkar India bad kane ka pynlong ia ki kam ban sahteng ha kiba bun ki liang.
Dang shen ngi la pynmih syndon da ka kot halor ki hok bad ka jingiaid lynti ki Hima Khasi States naduh u snem 1773 haduh 2017 khnang ba ki bor nongpyniaid ki nongmihkhmat ki NGO (ki Seng bhalang ) kin ioh lad ban pule ban sngewthuh ia la ka hok.
Kumta ha kane ka kynti ngi ngeit ba ki Rangbah ka jylla Meghalaya khamtam ki nongialam ka jaidbynriew Khasi baroh ki ban ia kynduh ia u Myntri Kam Pohiing, kin ia sei bad kren kum kawei na ki mat bad u Myntri Kam Pohiing halor ka jingsah teng Dulir Instrument of Accession bad Annexed Agreement kaba la mynjur da ka Sorkar India bad kaba la pruid dak ia ki nongrim shaphang u Pud U Sam, Ki Khlaw ki btao, ka khyndew ka shiap, ki Um ki Wah ki mar poh khyndew bad shaphang ka lynti ka ba kum kino ki rukom treikam ki Ain Ri India hapoh ki Ri Khasi States.
Ngi long kiba kloi ban ia snoh kti lang lada ki nongialam Sorkar Jylla ki donkam jing iarap ka jingshlur ban ia sei ia ka nia ka jutang da ki kot ki sakhi satar. Ka jingpynsahteng ia kine ki jingiakut ki pynlong sah ia ka jaidbynriew ban ia khih khlem sangeh na ka jingiatyngkhuh bad ki Ain Ri India na kawei sha kawei khlem sangeh.
Ha ka juh ka por ngi pynpaw ba la dap ki duli da ki jingthoh ki jingiakren hapdeng ka tnad Ministry of Home Affairs, bad ka Federation of Khasi States kaba sah ka long ba ka Ministry of Home Affairs, Govt of India, kan shim khia halor ki dorkhast kiba bun tylli kiba ki Khlieh Nongsynshar ka Ri Khasi, Jaintia bad Garo ki la thoh na ka por sha ka por, bad ban khot ia pynbeit pyntreikam ia kine ki jingiateh ki jingkular kumba la ia kut ia soi bad mynjur, kiba dang sah teng haduh kine ki sngi.
