Shillong, Nailar 6: Ka jingiakren biang ban ia pynbeit pud hapdeng ki ar ngut ki myntri rangbah ka jylla Meghalaya u Conrad K Sangma bad Assam myntri rangbah ka jylla Assam u Himanta Biswa Sarma kala long mynta ka sngi ha Guwahati ha ka jingiadon lang ki myntri cabinet jong ki ar tylli ki sorkar.
Ha kane ka jingiakren kaba la long mynta ka sngi kila ia mynjur ban sdang shuwa na ki hynriew ki jaka kiba ia kam markylliang ka, Tarabari, Gizang, Hahim, Boklapara, Khanapara-Pilangata bad Ratacherra, kine ki jaka kiba ym da kyllain eh ha ka jingiakam mar kylliang.
U Myntri rangbah ka jylla Meghalaya haba kren ha ki lat pathai khubor la ong ba kane ka iakren kila shim ia ka rai ba ka jingiapynbeit kam pud kan long halor ka nongrim, katkum ki history, ka jingdon jong ki briew kiba shong, ka jingbiang ban ai ka jingshakri, ka jinglong kaba la kloi, kaba kham kyrpang ka long katkum ka jingsngew jong ki briew bad ka jingiabteng jong ki haka ta ka jaka.
Ha kane ka jingialang la rai ban thaw ia ki ali tylli ki kommittee ban khleih da ki myntri kabinet na Meghalaya bad Assam bad kin don mar san ngut na Meghalaya bad Assam kaba mut ha kawei ka kommittee kin don shiphew ngut.
Ha kane ka jingiakynduh mynta ka sngi kila ia kren shai ba ki kwah ban ia pynbeit ia kane ka jingeh ha khappud ha pdeng ka jylla Meghalaya bad Assam dei na kane ka daw ba kin sdang shuwa na kine ki 6 tylli ki jaka na ki 12 tylli kiba don ka jingiakam mar kylliang.
U myntri rangbah ka jylla Assam u la ong ba ki lai tylli ki kommittee kin hap ban ai ia ka kaiphot hapoh laiphew sngi la ong ba namar ia kine ki kommittee la khlieh da ki myntri kabinet kin hap ban ia peit ba ia ki jingeh kin ia pynbeit ha jaka bad dei tang lada kim lah ban ia pynbeit sa rah sha ka kyrdan ki myntri rangbah.
U Himanta u la ong ba hadpeng kine ki 30 sngi na ka liang jong u bad u myntri rangbah ka jylla Meghalaya kin leit sha Langpih ban leit jngoh ia kane ka jaka bad ban pynia sha ki nongshong shnong ba ki don ia ka jingkut jingmut ban ia pynbeit ia u pud u sam ha pdeng kine ki ar tylli ki jylla, la ong u mytnri rangbah ka jylla Assam.
