Shillong, K.Lyngkot 07: U bah Prestone Tynsong symbut myntri rangbah ka jylla u la ong ba haduh mynta ka jylla Meghalaya ka don tang kawei kaba dang shitom na kane ka jingpang kaba la Test COVID-19 positive Omicron.
La iathuh ba mynta ka sngi kiba la test COVID-19 poistive ki don 64 ngut, haba bishar bniah ia ka jinglong jingman ka khlam Covid -19 ha ka jylla ka ba la long mynta ka sngi u Symbud myntri rangbah u la iathuh ba na ka liang ka tnad ka koit kakhiah ks la pynmih sa ia ki katto katne tylli ki kyndon ha ka ba ia dei bad ka khlam Covid-19 .
Ka sorkar jylla mynta ka sngi ka la shim ia ka rai ban phah leh ia ka test RTPCR ia baroh ki briew ki ba wan sha ka jylla ha ki jaka test ki ba don ha ki khyrdop ban rung sha ka jylla lait noh tang ki briew ki ba la don ia ka syrnot test ka ba long negative hapoh ka 72 kynta kin lah ban rung sha ka jylla.
Ha ka ba ia dei bad ki kyndon thymmai haba ki shong kyrpang ha la ki ing ki sem la shim ia ka rai ba ki briew ki ba la test positive hynrei kim don ia ki dak ki shin ba ki shitom ki dei ban shong kyrpang 5 sngi bad ki briew ki ba don ia ki dak ki shin jong ka ne ka jingpang Covid ki dei ban shong kyrpang haduh 7 sngi .
La iathuh ba ki briew ki ngat ha u ne u khniang jingpang hynrei ki bun hi ki dei ki bym don ia ki dak ki shin kumta na ka liang ka sorkar ka kyrpat ba ki dei ban shim khia ban phah leit test ia lade ban tip ba ki long positive bad ki ba don ia ki dak ki shin jong kane ka jingpang ki dei ban shong kyrpang ia lade 7 sngi.
Na ka bynta kito kiba la test Positive hynrei kim don ki dak ki shin ki dei ban shong kyrpang 5 sngi ha ing ha sem bad ka ne ka long kat kum ka jingaijingbit na ka liang ka Ministry of Health bad WHO”la ong u bah Tynsong.
U bah Tynsong u la ong ruh ba kat kum ka kaiphot ba la ioh ha ka ne ka wat balai jong ka khlam duna ki briew ki ba shitom jur ki ba donkam ban phah sumar ha ki hospital bad kumjuh ki duna ruh ki ba khlad bad kane ka long namar ba bun na ki briew ki la ioh ia ka Tikka.
U Symbud myntri rangbah u la kyntu ia ki nongshong shnong ba ki dei ban shim khiah ban shim ia ka Tikka namar ba mynta hi ki briew wat la ki ngat ha ka jingpang Covid-19 hadien ka jingai Tikka hynrei kim ju shitom jur.
