Shillong, Nailar 11: Ka myntri ba dei peit ia ka tnad pynroi sor ka kong Ampareen Lyngdoh ka la ong ba ka jingpang shini ha kane ka jylla ka la jyllei bha hynrei duna ki briew kiba tip ia kane ka jingpang. Ka la ong ba kane ka jingpynlong ia kane ka jingsumar ei da ka Bansara Eye care Centre kan long ka jingiarap kaba khraw ia ki briew.
Naka liang jong ka myntri kala ai khublei kyrpang ia ka Bansara Eye care Centre kaba la trei shitom ban pynlong ia kane ka jingai jingsumar ei bad ha ka juh ka por ban ai jingpynshai sha ki paidbah jong kane ka jylla Meghalaya ha kaba ia dei bad kane ka jingpang kaba la ktah bha mynta.
Ha ka jingkren jong u Dr B Khongsit Joint Director ba rim jong ka jylla bad u ba bat ruh ia ka kam kum u nongai buit ia ka Ophthalmology jong ka sorkar jylla u la ong ba kaba don kam ka long ba ki briew ki hap ban leit phah peit ia la de na ka por sha ka por sha ki doctor bad ki briew ki dei ban sngewthuh ia kane.
Ka Bansara Eye Care Centre ka la pynlong ia kane kqa jingsumar ei da ka jingiatreilang bad ka Society for Promotion of Eye Care and Sight (SPECS) bad ka World Diabetic. Ha kane ka jingsumar ei la pyndon kam da ki tiar kiba katkum kane ka juk kaba mynta ban lap ia ki jingpang kiba don ha ka met jong u briew.
Kiwei kiba la ai don lang ha kane ka sngi ki long ka Dr. Jennifer Basaiawmoit, Medical Director of Bansara Eye Care Center, Dr. Saurabh Sarma, Medical Retina Specialist, U Sanjay Goyal, Deputy Commissioner, East Khasi Hills, Shillong lem bad kiwei kiwei de.(SP News)
