Shillong, Nailar 15: U Deputy Commissioner jong ka East Khasi Hills u la ong ba na ka liang jong ka District Adminstration ka la shah ia ki seng bhalang ba kin pynlong ia ka jingialang paidbah ka jong ki ban ia kren halor ka ILP la shai ka sngi ha Madan Student.
Ha ka juh ka por na ka liang jong ka District Administration ka la khang ban nym shah ban iaid paidbah ia kaba la tip kum ka Rally ne ka procession.
Ka daw ka long ba u myntri rangbah ka jylla u Dr Mukul Sangma u la khot ia ki seng bhalang bad ia ki seng sain pyrthei ban ia kynduh bad ki ha ka 29 tarik mynta u bnai ban ia kren halor kane ka ILP.
Ki bor ba dei peit ia ka District Administration ki sngew ba lada ka don ka jingiaid paidbah kum ka rally lane ka procession ka lah ban wanrah ia ka jingkulmar. Kane ka long katkum ka jingphah khubor na ka ophis jong u DC East Khasi Hills.(SP News)
