Shillong, Risaw 06: Ka seng Hynniewtrep Achik National Movement kam hun tang ban leit khynra ia ki karkhna thang dewiong ha ki thian Nongjri ban pynshi ia ka jinglong trei dei mano ka seng kala leit sha ka ophis jong ka Meghalaya Pollution Control Board kaba don ha Shillong.
Ha kane ka jingleit kila ia kynduh ia u bah S. Syiem engineer ba dei peit ia ka tnad mariang, ha kane ka jingleit wat jingtip la shem ba ka karkhna thang dewiong ba u bar jylla u kren ha ki dkhot ka seng ha ka 30th Nailut 2022 ba ka dei jong u MLA ka Mawthyngkut bah Gigur Myrthong ka long kaba bakla, ka seng ka pynrem ia u tei u briew bala pynthohbria ia u tei u nongmih khmat.
Ha kane ka jingleit wat jingtip la shem ba ka Karkhana thang dewiong M/S Nimon Enterprise ka dei jong ka kong Ridalin Law kam dei jong u bah Gigur, ka seng ka sngewkmen ban iohi ba ki briew la jong kila lah ban trei, hynrei lada shem ba ki dei tang ki nongshah kyrteng ka seng kam khandam syndon.
U President ka seng HANM jong ka South West Khasi Hills District, u bah Lambokstar Marwein haba kren ha ki lat pathai khubor la ong ba ka jingwan jong ki sha Shillong mynta ka sngi ka long ban lap ia ka jingshisha baroh la katei ka jingkynnoh jong u Manager ka karkhana thang dewiong ka dei shisha ne em jong u MLA ka Mawthungkut.
Haba ka seng kala ia kynduh ia u bah S Syiem Engineer Environment, la pyni ia ki kot ki sla sha ki dkhot ka seng ba ka karkhana thang dewiong M/s Nimon Enterprise ka dei jong ka kong RidalinLaw kam dei kumba la kynnoh da u manager katei ka karkhana ka seng ka pynrem ia kane ka jingkynnoh.
Ha kane ka jingiakynduh ka seng kala kylli hato katno tylli ki karkhana thang dewiog kiba la ioh jingbit ban thang bad katno tylli ki aplikoshon ki don, u tei u ophisar la iathuh ba ha South West Khasi Hills ki don 6 tylli kiba la ioh jingbit, ha West Khasi Hills 4 tylli bad ha Jiantia Hills 14 tylli baroh ki long 24 tylli. La iathuh ba ki aplikoshon ki don palat spah tylli ha ka jylla baroh kawei.
Ha ka juh ka por ka seng kan nym shong kli kti hynrei kan dang iaid wat ia ki kyrteng ban pynthikna ba kan nym don kano kano ka jingia trei benami, lada ki briew la jong ki paradoh para snam ki ka seng ka ai ka jingkitbok, hynrei lada shem ba don ka jingtrei benami ka seng kan nym ailat.
Kane ka dei tang ka jingsdang ba ka seng kan khynra ia ki ba trei benami, ym tang ha South West Khasi Hills District, hynrei ha kylleng ki bynta jong ka Ri Khasi Jaintia, ka seng kam kwah ban iohi ba ki briew jong ngi kin shah pyndon kam bad kin myntoi.
