Shillong, Naiwieng 02: Mynta ka sngi u mytnri rangbah ka jylla u Conrad K Sangma u la plie ia ka jaka pule Nurse ha Pahamsyiem, Nongpoh kaba hap hapoh jong ka Ri Bhoi District.
Haba kren ha kane ka jingialang u myntri rangbah la ong ba ka jylla kala mang pisa shibun bha ha ka koit ka khiah ban pynioh ia ki paidbah ia ki lat jingsumar kiba biang, wat ha pdeng ki jingeh kiba bun ka sorkar hapdeng ka khlam COVID-19 kala shna shibun ki jingtei ha kaba ia dei bad ka koit ka khiah ban suk ki paidbah.
Kane ka sorkar mynta kala kyntiew kyrdan ia shibun ki Dispensary sha ka CHC bad ia ki CHC sha ki PHC, la dang pynbha ruh ia shibun ki jaka ai jingsumar ha kylleng ki bynta jong ka jylla naduh ki jaka sor sha ki jaka nongkyndong.
Ka sorkar ka sngewthuh ia ka jingdon kam ban pynkhlain ia ka tand ka koit ka khiah, da kaba pynbha ia ki jingtei, ka jingdon kam ia ki briew ban trei, ka jingdon kam ia ki kor ki bor kiba katkum kane ka juk kaba mynta, dei hangne ba don kam shibun ka jingbei pisa.
La ong ba ka jylla Meghalaya kam dei ka jylla kaba bun briew, ki don 6500 tylli ki shnong, hynrei ka jingdon jong ki briew ki saphriang kumta ka jingdon kam ban buh ia ki jaka ai jingsumar, ki jaka pule ba dkiwei ki jingdon kam kiba ka sorkar ka hap ban pynbiang.
Ka jingeh kaba khtah bha ia ka tand ka koit ka khiah ban pynbiang ia ki briew ban trei, kumba ka long mynta ka don ka jingduna ki briew kiba trei hapoh ka tnad ka koit ka khiah bad kane ka sorkar ka ialeh ban plie bun ki jaka ai jinghikai, ha kane ka sngi la don lang ruh u MLA kane ka jaka u bah Meralborn Syiem bad kiwei kiwei ki heh sorkar.
