Shillong, Nohprah 17: Ka seng Hynniewtrep Achick National Movement (HANM) kala khot ia ka jingialang jong ka Central Executive Committee kan ban long ha ka 22 tarik mynta u bnai ban ia kren ia ki mat jingdawa jong ka jaidbynriew bad kiwei kiwei ki mat kiba don kam.
Ia ki mat ban ia kren yn sa pynsngew da u President ka seng kmie ha katei ka sngi ba don ka jingialang, kumta la bthah ia baroh ki President bad Secretary jong ki shnat kiba don ha kylleng ka jylla ban ia poi sha katei ka jingialang ba kyrpang bad bakin shim ia kane kum ka jingpyntip.
Ka jingiakynduh lang jong ki nongialam ka CEC kan long ha ophis jong ka seng ha New Shillong, la bthah ia baroh ki shnat ba kin ia poi ha ka por ba biang ban dup lah ban ia kren ia kaei kaba ka seng ka juh ieng na ka por sha ka por ha kaba ia dei bad ki mat kiba ka jaidbyniew ka ieng ban dawa.
La pyntip ba ja jingialang jong ka CEC kan long ha ka por 11.00 baje mynstep, kane kan long ruh kum ka dorbar kut snem jong ka seng, ha kane ka CEC kin ia kren tang ia ka kam ba dei ia ki mat ba ktah ia ka jaidbynriew, kane ka long katkum ka kyrwoh kaba a phah da u President ka seng kmie HANM bah Lamphrang Kharbani.
