New Delhi, Jymmang 28: U Myntri Rangbah ka jylla u Conrad K Sangma ba dei u President ka NPP, ka MP Lok Sabha ka Agatha Sangma, kila leit ban ia sakhi lang ia ka jingplie ia ka iing dorbar Parliament ba thymmai jong ka Ri India ia kaba la plie mynta ka sngi da u Myntri Rangbah duh jong ka Ri India u Narendra Modi.
U Myntri Rangbah ka jylla Meghalaya la ong ba kane ka jingplie ia kane ka iing dobar Parliament kaba thymmai kan long ka jingjop ha ka jingiaid ka Ri India ha ka synshar paidbah, kane ka iing dorbar thymmai kala pynurlong ia ka jingangnud ki 1.44 billion ngut ki nongshong shnogn ka Ri India ha ka jingiatylli.
Kane ka iing dorbar kaba thymmai ka ngiam haduh 888 ngut ki dkhot ka Lok Sabha, kane kan kyntiew ia ka synshar khadar bad kan dang pynkhlain shuh shuh haba shim ia kino kino ki rai ha ka synshar paidbah.
U Myntri Rangbah ka jylla la ong ba u sngewsarong ban ia don bynta ha kaba plie ia kane ka iing dorbar jong ka RI ka long ka burom shisha, u la pynkynmaw ba u Purno A Sangma u la long u Lamphang kane ka iing dorbar Lok Sabha, u juh don ka jingthrang ba ka North East kan long ryngkat bad kiwei ki bynta jong ka Ri.
Kane ka dei ka sngi sah kynmaw ba ka Ri India kala iaid sha khmat ha ka synshar paidbah bad ka jingkut jingmut ban pynneh pynsah ia ka synshar paidbah bad kane ka iing dorbar kaba thymmai kan dang pynkhlain shuh shuh ha ka synshar khaddar.
Ka jingplie iakane ka iing dorbar thymmai ka Parliament ka kdew shai ia ka jingiaid shaphrang jong ka Ri bad ka jingkiw ha ki bynta baroh da ka jigniatreilang bad haba don ki jigneh don kam ia ka jingiamir jingmut ban shna ia ki polisi ban kyntiew iaka bha ka miat ki paidbah.
