Shillong Nailur 29: Ki nongialam jong ki 10 tylli ki seng ha ka jingiakynduhlang ka jong ki ha ka sngi saitjain, kila shim ia ka rai ban pynlong ia ka Pakhang Surok Miet ne ka Night Road Blockade ha ka 1tarik 3 bad 4 tarik u Risaw bad kane ka pakhang surok miet kan sdang naduh ka por 8 baje mynmiet bad kan kut pat ha ka por 5 baje mynstep.
U nongai khubor jong ka seng Federation of Khasi Jaintia and Garo Peoples (FKJGP) u Eldie N Lyngdoh haba iakren bad u nongthoh khubor, ula ong ba ki nongialam sengbhalang kila bteng biang ia ka jingiakhh kadei halor ka nongrim jong ka jingkuman ka sorkar ban pyntreikam noh mardor ia ka Inner Line Permit ha ka jylla.
Shuh shuh ula ong ruh ba ka rai jong ka sorkar MUA II ban pyntreikam da ka Regulation of Landlords and Tenants Verification Bill’ ka long pyrshah ia ka jingdawa bad ia ka jingangnud jong u paidbah bad ia ki sengbhalang ruh kumjuh.
“Ka jingkwah ka jong ngi ka long ban pyntreikam noh mardor ia ka ILP ka ain kaba don ia ki bniat kiba khlain kaban tehlakam bad peitngor ia ka jingrung jingmih ki bar jylla, hynrei ka sorkar ka thmu ban shna ain thymmai na ka bynta u trai iing trai jaka bad ban iada pynban ia ki bar jylla kiban shongwai ha ki iing ki dukan” la ong u bah Lyngdoh.
Une u nongialam ula ong ruh, na ka liang jong ki sengbhalang kim pdiang satia ia kane ka ain da lei lei ruh bad ula kyntu ia u paidbah ba ma ki ruh kidei ban kyntait mardor ia kane ka ain namar kadei ka ain kaba tlot bad kaba shu pynthame ia u paidbah uba hok ba shida.
Shuh shuh ula ong ruh ba ki sengbhalang kim don ia kano kano ka jingthmu ban pynkhyllem ia ka sorkar ne ban pynkhyllem ia u Myntri Rangbah bad kim ia donkti hi bad kino kino ki seng sain pyrthei kumba la kynnoh da ka sorkar MUA hapoh ka jingialam u Dr Mukul.
Nalor kane ula ong ruh ba ia ka ILP ki sengbhalang kila dawa naduh u snem 2011 ha ka por ba u Dr Mukul u dang long u Myntri Rangbah jong ka MUA I bad la thaw ia ka High Level Committee on Influx bad kane ka committee kala ai ia ka jingmynjur ban pyntreikam ia ka ILP, bad haba u Dr Mukul ula ialam biang ia ka MUA II ula kylla ktien bad kyntait ban pyntreikam ia ILP kumba la bthah da ka committee bad mynta ula kynnoh ba ki sengbhalang kila iakhih ynda la dep ka elekshon bad kane ka long ka bym don nongrim satia.
“Kine ki jingkynnoh baroh kidei kiba khlem nongrim ban pynsngewthuh bakla ia u paidbah namar ba ka sorkar kam mon hi ban wanrah ia ka ain kaba khlain kaban the Bteng lakam ia u bar jylla uba wan buhai shnong ha ka ri bad ka jylla jong ngi, kiba la sdang ban mushlia ia ki kam ki jam, ka khaii ka pateng haduh ka imlang ka sahlang” ” la ong u Information & Publicity Secretary ka FKJGP.
Kine ki 10 tylli ki seng kila kyntu ia u paidbah ba kin iai shah bad ba kin ai ka jingkyrshan kaba pura ha kane ka jingiakhih na ka bynta ka jingbha jong ka jaidbynriew.(SP News)
