Shillong, Nailur 27: Ka KSU seng kmie lyngba kane ka kyrwoh ka pyntip ba ki dkhot ka KSU WJHDU kin hiar sha Lapangap ban kyrshan ia ki paradoh parasnam kiba shah pyntyrha ha ki paid Karbi kiba kam jubor ia ki lyngkha kba ki Khasi.
Ki paid Khasi kumba ju long naduh ki por hyndai hynthai ki ju rep riang ha la ki jaka kiba kham pajih na la ka shnong ka thaw. Kumjuh ruh ha Lapangap ki paid Khasi ki sah ha ki shnong hynrei ki jaka rep ba long nongkynti ma ki ki ju don sha pajih kum ha pdeng khlaw.
Pynban ki Karbi ki la shim kabu da kaba kam ba ki lyngkha kba ki Khasi ki hap hapoh u pud u sam ka Assam. Mynshwa ha ka por ba ki Khasi ki leit thung ia u kba, ym don ba pyndik hynrei da la dei ka por ban ot ia u kba, ki paidbhur Karbi ki la siat da ki jri bad ki khnam ia ki nongrem Khasi. Ka KSU ka ai jingiaroh ia ki nongshong shnong ka Lapangap kiba ieh rangbah ban iada ia la u pud u sam.
Ka KSU ka kyntu ia ki bor sorkar ka Meghalaya ban ai jingiada bad synran ia ki nongrep Khasi ba kin ioh ban leit ot ia u kba ba ki la thung shitom. Na ka liang ka KSU kan don ryngkat bad ki paid Khasi-Pnar kiba sah ha Lapangap bad kiwei kiwei ki bynta jong ka khappud Meghalaya-Assam bad ka KSU kan ym ai ailad wat tang shi inshi ruh jong ka Bri U Hynñiewtrep ba kan tuid sha Assam.
Kyntang ia wai ka KSU ka kyntu ia ki paid Karbi bad bor sorkar Assam ban long kiba adkar bad ban ym pyndik ia ki paid Khasi kiba leit sha la ki lyngkha. Ka KSU kam kwah ia ka jingiakynad para riewlum hynrei kam lah ruh ban shu peit haba ki paradoh parasnam ki shah thombor na ka por sha ka por.
Ka Lapangap, Mukroh, Khanduli, Langpih, Sabuda, Umwang, Moolber, Moojem, Psiar, Khatkasla bad kiwei kiwei ki shnong Khasi ki hap hapoh ka Meghalaya bad ka KAAC bad sorkar Assam kim dei ban kam trai ia ki, kane ka long katkum ka kyrwoh kaba la phah da u General Secretary u samla Donal V Thabah.
