Shillong, Risaw 07: Ka CSWO mynta ka sngi ka la pynpaw ia ka jingsngew kyndit jong ka halor ka jingkren jong u myntri rangbah ka jylla u Dr Mukul Sangma ia ki seng bhalang , hynrei kaba phylla ka long ba u myntri rangbah u ia da ia ki briew kiba la shah kynnoh bam sap, ong ka kyrwoh jong ka seng.
Halor katei ka jingkren jong u myntri rangbah na ka liang jong ka CSWO ka la ther kylla da kaba kynnoh ba u myntri rangbah haduh mynta u dang pyndeng syntiew ia ki briew kiba la shah kynnoh bamsap, kum ka jingpyndap sailieh ia ki application jong ki nonghikai skul,ki kam kynnoh bamsap ha ICDS, ka jingiadei iathied jaka sha ki IAS officer ha ka dor T.1 tyngka shi square Feet, ka jingai bhah ia u kew sha ki briew kiba la iap bad ka jingiathied jaka da ki kot kisla kiba shu soituh.
Katei ka seng kala kynnoh ruh ba ki la don bun ki jingiasait kiba la shu pharep bad kiwei kiwei dei ki jingleh jong ka sorkar. Halor kitei ki jingkynnoh wat la ka sorkar ka don ia ki jingtip kiba lah ban long ki sakhi hynrei kam shym la leh ei ei ban kem ne pynshitom ia ki, katba ia ki nongialam seng bhalang tang halor ka jingsuba la thwet ia ki.
Na ka liang jong ka CSWO kala ong ba ka seng kan nym lah ban pdiang ia ki jingiakhih la ka dei na ka liang jong ka sorkar ne na ka liang jong kino kino ki kynhun, hynrei ka seng ka ngeit ba ka ain kam dei kaba leh shiliang iano iano ruh bad ia kine ki ki ain la shana hi da ki nongmih khmat.(SP News)
