Shillong, Ïaiong 8: Ka Hynniew National Youth Front South East Circle da ka jingsngewkhia namar ka jingkharoi ki bar jylla ha ka thain Majai, East Khasi Hills District kila leit buh da ka shithi ujor ha u Chief Executive Member ka KHADC khlem da don jingtip na ki bor shnong bad Hima.
Ki dkhot ka HNYF South East Circle kila aiti noh da ka shithi ha ka ophis trei kam u CEM ha kaba iadei bad ki ar tylli ki hima kata ka kynthup ia ka Hima Sohra bad ka Hima Mawlong.
Katkum ka dorkhas ka HNYF la ong ba ka jingbym don jingtip jong ki bor shnong bad ki Hima bad ka jingbym don ka khana samari ia ki bar jylla na ka liang ka Hima bad ka ophis u syiem kan wanrah shibun ka jingma ia ki trai ri trai muluk hapoh kane ka shnong.
Shuh shuh ka dorkhas kala kdew, Ka jingai pathar ia ka pata jaka hapoh shnong Majai na fung ka Office u Syiem Sohra ka pynshlur ia ki bar jylla bad ai mynsien ia kiwei de ki mynder ban wan buhai shnong khlem salia ia ki trai muluk kiba don hapoh kane ka jaka.
Ka HNYF kala kyntu ia u CEM ba kin bthah ia ka ophis u Syiem Sohra ban pynkylla kyrteng noh ia ka shnong kaba hap hapon ka thain Majai na ka ktien nongwei sha ka ktien khasi bad kine ki shnong ki kynthup ia ka Kurikhal, Nayabsasti, Chaklabosti, Dhorombasti bad ia ka Albari.
Ha kaba iadei bad ka Hima Mawlong, hadien ka jingkhlad noh u Bah Lurshai Hynniewta ka dorbar Hima ba la pynlong ha u bnai Lber 2020 kala shim ia ka rai ban pynkylla kyrteng noh ia ki shnong kiba don ha khappud shaki kyrteng ba la buh da u long shwa man shwa ha ka Hima, kum ka Ichamati, Rangamati, Dhorom, Tallab, Khuri, Lubia, Kaliburi bad Peholi hynrei u Sordar Mawlong u dang shong khlikti haduh kine ki sngi la 5 snem mynta.
