Shillong Nailur 28: U bah P K Pangniang President jong ka party HSPDP u la ong ba wat la ki ba bun kila ieh ia ka party hynrei ka party ka dang mih shyluid hapoh ka jingialam jong u bah Martle N Mukhim ha East Khasi Hills District. Ka jingkhlain ka party kam shong ha ka jingbun paid hynrei ha ki nongialam.
Ha ka jingialang jong ka party HSPDP kaba dei jong ka East Khasi Hills District kaba la long ha Anton Hall Laitumkhrah u President ka seng la ong ba ha kine ki 54 snem ka party kam pat juh iaid thylli. Naduh ba sdang ka party kala ioh 2 ngut ki MP, 54 ngut ki MLA bad 60 ngut ki MDC.
U bah Pangngiang u la ong ba ka jingkhlain kam shong ha ka jingbun paid hynrei ka shong ha u nongialam bad u bah Martle mynta u ladei u nongialam ba radbah uba iar hadien jong u bah Hoping bam kwai ha dwar u blei.
Haba phia sha kiwei ki seng sain pyrthei la ong kim don ia ki nongialam kiba la kat ka rta u bah Martle N Mukhin ba kin don ha khmat, la da phai sha ka party Congress, ka party NCP kaba dang kha na ka Congress bad mynta ka kylla NPP, ha kano ka nongrim ki ieng shiphang ha ka dur syntiew, shiphang ha ka dur baje mynta ha ka dur ka kot.
Haba phai sha ka party HSPDP naduh ba dang ioh ia ka Autonomous State Movement ha ka kyrteng jong ka APHLC bad haduh mynta ka nongrim jong ka party ka long halor ka jinglong trai ia ka khyndew ka shyiap bad la ieng skhem ban pynneh pynsah ia ka hok bad ka bor longtrai ia ka khyndew ka shyiap, u pud u sam la ong u bah Pangniang.
U President ka seng u la kynnoh ba mynta la iohi ba ha ka shi miet shispah shi hajar tylli ki kali ki iaid beian ha ki surok bah. Kine kidei kiba khaii bad kit beain bad tih beain, kane kaba mut ba ka ri kam don ia ka Ain.
Ka HSPDP ka ju ong ba kan pynioh ia ka hok bad ka bor ban shynshar hi ia ka khyndew ka shyiap hynrei ym don ba sngap ba sngew. Dei ynda ka NGT ka la pynsahngeh ia ka jingkhaii dewiong ha kane ka ri jong ngi namar ba ka bor kam don shuh ha kane ka ri bad mynta la shah kurup ia ka bor bad ha hok halor ka khyndew ka shyiap.
U la ong ba ka HSPDP sa shisien ka ieng mynta ban dawa na ka sorkar India, ban pynkylla ia ka 6th Schedule bad ban pynkup bor ia ka jadibynriew ban weng ia ka kti jong u President bad buh ia ka kti jong u Governor ha ka 6th Scheldule khnang ba ka sorkar kan don ka bor ban thaw ain ia ka khyndew ka shyiap. Kane ym don ba sngap hynrei mynta ki la sngewthuh balei ngim don shuh ka iktiar.
U bah Pangniang u la ong ba ka party mynta ka don sa kawei ka jingiohi kata ka long ban dawa ban ithuh ia ka Jaidbynriew ritpaid Khasi Pnar da ka kyrteng Khasi Jaintia State kumba ia ka jaidbynriew Mizo la ithuh da ka jylla Mizoram bad ia ki jaidbynriew ha baroh kawei ka ri India la jer ia ka kyrteng ka jylla kum ia ka jaidbynriew Punjabi la jer da ka Punjab bad ia ki Assamese la jer da ka Assam.
Kane kan sa dei ka mat kaba ha kawei ka sngi ki paidbah kin sa sngewthuh bad ia mynta kim pat sngew donkam .Ai ba ka Ri India kan ithuh ia ka jylla da ka kyrteng ka jaidbynriew ong u bah Pangniang President ka party.
Ka party HSPDP mynta ka sngi ha ka jingialang paidbah kaba Ar jong ka HSPDP East Khasi Hills District Branch, ka la shim ia ki katto katne ki rai bad kawei na ka rai ba kongsan ka long ban trei buit bad bor na bynta ban pynjop donburom ia ki Kyrtong ba ka party kan sa pynieng ha u 2023.
Ha kane ka sngi la thung bad la pynskhem ia ki dkhot treikam ba thymmai jong ka District. Ki dkhot treikam thymmai ki kynthup ia u bah Martle N Mukhim kum u President, Vice President bah Sandondor Ryntathiang bad bah B Mawkhiew,General Secreatry bah Edmund Lyngdoh Nongbri, Joint Secretary bah bah Bishar Ryntathiang , Treasurer bah Kyrshan N Mukhim, chief Organiser bah Kyrshanbor Paliar bad u Auditor bah B Mawlein.
