Shillong, Rymphang 14: Ka Khasi Students’ Union – Laban Circle ha mynta ka sngi kala leit buh dorkhas sha ka Deputy Commissioner East Khasi Hills bad ka la ai por 15 sngi ban kyndang noh ia ki briew ba sah beaiñ ha Maxwelton Estate.
Kane ka ishu ka la sahkut tang ha ka miej jingiakren naduh u snem 2022 bad kam shim I don kano kano ka jingpynbeit na ka liang ka Sorkar bad ka Ophis jong Deputy Commissioner ban weng ia kine ki briew ba sah beaiñ bad kat nang mih ka por ki briew ki dang jyllei bad dang rung khlieh shuh shuh ki bar jylla.
Ka Seng ka la pynpaw ba kine ki briew kiba sah beaiñ ha kane ka jaka kaba hap hapoh ka Municipal area ki ri masi, ki pyntuid jaboh shapoh ki nala, ki wah bad kane ka ktah lut ia ka koit ka khiah jong ka Shnong ka thaw.
Bad ha municipal area ka aiñ kam shah ban ri jingri hynrei ki bor pyniaid ki matlah bad kim shim la leh eiei halor kane ka bynta. Ha kaba iadei bad kane ka bynta ka Seng ka kynduh na ka por sha ka por ia Shillong Municipal Board bad ha ka 5 tarik u Jylliew 2023 ka la buh dorkhas bad maham tyngeh ba ka SMB ka dei ban shimkhia ban kyndang ia kine ki briew.
Na ka liang ka SMB ki mynjur ha kato ka por bad ki la phah notice sha kine ki briew hynrei ka shu kut noh tang ha ka jingdaiñkuna hynrei ka jingiakren ka kylla noh ba ka SMB kam shim don ka bor ban pynmih ia kine ki briew, bad ka Seng ka suba jur ba ka don eiei sha lyndet ba ka kylla ktien ka SMB.
Kine ki briew ki sah beaiñ hynrei ki ioh ia ka light ka um khlem kano kano ka jingsiew. Na ka por sha ka por ju iohsngew ruh ba ia kine ki briew la bei pisa da ki kynhun shitniam jong ki Hindu. Kane ka jaka ka la long ruh kum ka ktem droks, kam leh awria, ka tuh ka thiem bad kane ka buh jingma ia ki nongshong shnong baroh.
Kaba sngew thamula ka long ba kane ka jaka ka don marjan bad ka Assembly hynrei ki nongmihkhmat ka jylla ki long kiba matlah bad man ka por ki leit sha Assembly hynrei kim shim lah ban peit bad khmih ia kane ka jaka.
Ka Seng ka kyntu ia baroh ki nongmihkhmat ka jylla ba ha kane ka Assembly ka ban wan, ba kin sangeh ban hiar bad peit bad khmih ia kane ka jaka kin sa lap ia ka jingjaboh, jingsma iwli ba mih na kane ka jaka.
Kane kan long ka jingiakynduh kaba khatduh na ka liang ka Seng ban ujor ia ki bor pyniaid bad lada kim lah ban leh eiei halor kane ka bynta hapoh 15 sngi, ka Seng hi kan shim ia la ka jong ka sienjam.
Ka Seng ka kwah ban iaid da ka lynti ba jai jai ryngkat ki kyndon aiñ hynrei lada ki bor pyniaid ki leh matlah, ka Seng kan hap ban shim hi ia ka aiñ ha la ka kti na bynta ka bha ka miat jong ka jaitbynriew.
