Shillong, Risaw 21: Hadien ka jingpyrshah jong ka KSU Umsning Circle ban bret Blei jong ka Puja Committee jong ka thain Zero Point hapoh ka pung Nongmahir , mynta ka sngi naka liang ki nongialam bad ki dkhot jong ka KSU Umsning Circle kila leit ban ap pahara hajan ka pung Nongmahir kane ka jingleit ap pahara ka long ba ioh don ba leit bret iaki blei ha kane ka Pung .
Haka tei ka jingleit ap pahara la ialam khmat da U President ka Umsning Circle u Samla Lester Nongbet bad u General Secretary u Samla Laraplang Nongbri haka jingsynranlang bad jingiadonlang u Rangbah Shnong Nongmahir u bah Elbin Ripnar.
Hadein ka jingap bad pahara ka seng katto katne por mynta ka sngi naka liang ka Puja committee jong ka thain Zero Point kim shem la poi ban bret Blei ha katei ka Pung Nongmahir hadien ka jingpyrshah jong ka KSU Umsning Circle ban bret blei ha katei ka Pung .
Kum ban shu kdew ba naka liang ka KSU Umsning Circle ha u snem 2023 kala khang pyrshah bad maham jur iaka Puja committee jong ka Umsning ban bret Blei haka Wah Umran Diary bad mynta pat kala khang pyrshah sa iaka Puja Committee jong ka thain Zero Point ban bret Blei haka pung Nongmahir.
Ka Seng ka lah pynpaw ruh ba iaki jingbret Blei ka pynkhein ia ka Water (Prevention and Control) Act 1974 bad kumjuh ia ki wei na ki Guidlines kaba lah pynmih da ka Central Pullution Control Board ha u snem 2010,kata ka dei ban pyn ngam um ia ki Blei da kaba tih hi ia ki Artificial Pond lane ki pung kiba tih hi shipor.
Ha kane ka juh ka sngi naka liang ka KSU Umsning Circle kala pynlong ruh daka jingthung dieng ha shi lynter ka Pung Nongmahir ha kaba la ia shim bynta lang daki Nongialam bad ki dkhot jong ka Umsning Circle.
