Shillong, Jymmang 17: Ka kynhun ki samla pule ka Kiang Nongbah Govt College ba la ialam da u President ka KNJC u samla Preciousstar Sten mynta ka sngi ki la leit ban aiti ia ka memorandum sha u Chief Secretary ka sorkar jylla ban pynsngew ia ki ba bun ki jingduna ba ha katei ka shlem ai jingstad
Haba kren ba ki nongthoh khubor u samla Preciousstar Sten u la ong ha Jaintia Hills don tang katei kawei ka college, ha kaba ia katei ka college la seng hashuwa ba ka jylla Meghalaya ka ioh ia ka jylla ba pura.
Hynrei kaba lynngoh ka long ba haduh mynta ki ba bun ki jingdonkam ba duna, bad kane ka ktah ia ki khynnah ba leit ban pule ha katei ka college bad ia nonghikai ki ba ai jinghikai ha katei ka college
U samla Preciousstar Sten u la iathuh ba kane ka college ka la dep ban Accredited na ka NAAC haduh kine ki sngi, wat ha pdeng ki jingbym biang Ki jingdonkam kum ka building na ka bynta ki khynnah ba pule graduation kat kum ki kyndon jong ka UGC bad NEHU.
Shuh shuh u la ong, naduh ba ka college kam khlem lah ban leh kat kum ki jingbthah na poh NEHU, kane ka college ka la shah kyntaid ban sdang ia ka master degree ha ka subject education bad kane ka dei kawei kaba la ktah ia ki samla pule jongnka dong ka thaiñ Jaintia Hills na ka bynta ki course ba pher ba pher.
U samla Preciousstar Sten u la pyntip ba ki la kyrpad ia u CS ban shikhia haba iadei kane kumjuh ruh ka education department ban pynioh noh kum ki Laboratories bad ki kamra klas na ka bynta ki nongpule physics ba haduh mynta ki khunnah ba pule physics bad Zoology department ki hap ban pyndonkamlang ha kajuh ka kamra.
U la ong ba ha kine ki sngi ban wan ka Kiang Nongbah Govt College kan sa sdang ruh ia ka Integrated Teacher Education programme kaba long 4 snem course hynrei tang na ka bynta kine ki department ba la don ruh ka College kam don ia ka building bad ki kamra klas ki ba biang.
