Shillong, Nailar 04: Mynta ka sngi ka Ka Khasi Students’ Union (KSU), Umsning Circle, hapoh ka jingialam u Samla Lester Nongbet President bad ka jingdon lang kiwei ki dkhot ka seng ka la ioh ban kynduh ia u MLA ka 11-Umsning Constituency, Dr. Celestine Lyngdoh, ban pynsngew halor ka mat kaba kongsan shaphang ka jingduna jong ki Doctor ha Community Health Centre (CHC), Umsning.
Ha kane ka jingïakynduh, ka Seng ka la pynpaw ia ka jingsngewkhia halor ki jingeh ba ki paidbah nongshong shnong ka thaiñ Umsning ki mad man ka por namar ka jingduna jong ki Doctor ha katei ka jaka sumar.
Kane ka jingduna ka la ktah jur ia ka rukom ai jingsumar, kaba la pynlong ia bun ki nongpang ban mad ia ki jingeh haba ki leit wad jingsumar bad shim dawai. Ym tang katta, hynrei don ruh ki jingjia kiba sngewsih kiba la mih na ka bynta kane ka jingbym biang ka rukom treikam jong ka CHC.
Ka Seng ka la pyntip ruh ia u MLA ba mynshwa ka la dep ban iakren bad ki bor ba dei peit ia kane ka jaka sumar halor kine ki jingeh, hynrei haduh mynta ym pat shym la don kano kano ka jingpynbeit kaba biang. Kumta, ka Seng ka la shim ia ka sienjam ban iakynduh ia u MLA khnang ba un lah ban rah ia kane ka mat sha ka Sorkar bad ka Tnad ba dei peit.
Na ka liang jong u MLA, u la batai ba katto katne ki Doctor ki dang shim shuti ban bteng ia ka jingpule jong ki, bad u la ong ruh ba ka jylla hi baroh kawei ka dang mad ia ka jingduna ki Doctor, kaba la ktah ia ka jingtreikam ha bun ki jaka ai jingsumar.
Hynrei, na ka liang ka Seng kam shym la pdiang ia kane kum ka daw kaba biang ban ailad ia ka jingdkoh jong ka jingshakri paidbah. Ka Seng ka la ban jur ba ka Sorkar bad ka Tnad ka Koit ka Khiah ki dei ban shimkhia bad wad da ki lad ki lynti ban pyndap noh ia ki jaka ba lait khnang ba ka CHC Umsning kan lah ban ai jingshakri kaba paka, kaba iaid beit bad kaba ai jingmyntoi ia ki paidbah.
Ha kaba kut jong ka jingïalang, u MLA Dr. Celestine Lyngdoh u la kular ha ka Seng ba un sa iakren bad tuklar ia kane ka kam bad u Minister In-charge jong ka Tnad ka Koit ka Khiah, khnang ba yn lah ban pynsted ia ka jingthep Doctor ha CHC Umsning bad ban pynthikna ba ka jingshakri paidbah kan nang iai long kaba iaid beit, kaba iaid ryntih bad kaba lah ban pynbiang ia ka jingdonkam jong ki paidbah ka thaiñ Umsning bad ka them Ri Bhoi hi baroh kawei.
