Shillong, Iaiong 21: U Myntri Rangbah ka jylla u Cornad K Sangma mynta ka sngi u la ong ba ka jinglong jingman jong kane ka khlam COVID-19 ha ka Ri bad ka jylla ka long kaba isherkhei namar ka jingkiew kala dang kiew bad hap ban leh ei ei mynta ban iada na ka jingsaphriang kane ka jingpang.
Ban iada na kane ka jingpang ki ar tylli ki bynta kiba kongsan kaba hap ban leh ka long ba ki briew ki hap ban bud ia ki kyndon kiba la dep ban hikai bad bthah na ka por sha ka por bad ka bynta kaba ar ban iada na ka jingpang dei ban leit ai Tika COVID-19 ban iada.
“Nga ia lade nga la dep ai Tika bad kumba ka long mynta la jan shilak shiteng ki briew ha ka jylla kila dep ban ai Tika bad haduh mynta kam shym don kano kano ka jingud bad kam don kano kano ka jingma bad la ioh jingtip ruh ba kane ka Tika ka iarap ban iada” la ong u myntri rangbah ka jylla.
U Myntri Rangbah ka jylla u kyntu ia ki paidbah nongshong shnong jong ka jylla ba kin leit ban ai Tika ha ki jaka ba jan eh bad ka jaka ba ki shnong bad kane ka long kaba kongsan tam ban iada bad ka sorkar kala shim ia ka rai ban pynthikna ba ai Tika ia baroh kiba la kot ia ka 45 snem shaneng.
Katkum ka jingkhein ka long ba ka jylla Meghalaya ka don kumba 6.5 lak ngut ki briew kiba don 45 snem sha neng ha kane ka jylla bad kane kam dei ka thong kaba heh bad na ka liang jong ka sorkar kala shim ia ka rai ba kan pyndep ia kane ka jingai Tika.
