Shillong, Risaw 25: Mynta ka sngi ka sorkar Meghalaya bad ka North Eastern Electric Power Corporation Limited (NEEPCO) ha ka jingdon lang u symbut myntri rangbah ka jylla u bah Prestone Tynsong kila ia soi ia ka soskular ban pynbha ia ka Wah Umiam Hydro Electric Project (50 MW) Stage-I bad Wah Umiam Hydro Electric Project (100 MW) Stage-II kiba don ha Ri Bhoi District.
Haba kren ha kane ka jingialang u bah Prestone u la pynpaw ia ka jingsngewnguh ia ka NEEPCO kaba la ia soi ia ka soskular ban pynbha ia kitei ki ar tylli ki jaka pynmih bor ding elektrik ki ban pynmyntoi ia ka jylla bad ka sorkar kan ai ka jingkyrshan baroh ban pyndep ia kane ka jingtrei ha ka por b biang.
Kumba ka long mynta ka jylla ka shem jingeh ban pynmih ia ka bor ding, kumba ka long mynta ka jingpynmih ia ka bor ding ka long tang 350 mw katba ka jingdon kam pat ka long haduh 650 mw kane ka pynishai ba ka don ka jingduna ha ka jingpynmih bad ka jingdon kam.
Ka sorkar kala wat ki lat ki lynti kumno ban wanrah ia ka jingkylla ha ka rukom pymih bor ding ha ka jylla bad kane ka jingiateh kular bad ka kompnei pynmih bor ding jong ka sorkar pdeng kum ka NEEPCO ka long kaba don kam haduh katta katta.
La ong ba ha ki snem kiba la dep la ia soi bad ki kompeni shimet hynrei kila kynran dien bad kane ka jingiasoi bad ka NEEPCO ka long kaba don kam namar ka dei jong ka sorkar bad kane kam pynurlong ia ka jingangnud jong ki paidbah.
U bah Prestone la ong ba ka jylla Meghalaya ka don ia ka lat ban pynmih haduh 3000 mw hynrei ia mynta dang lah ban pynmih tang 250 mw bad kane ka jingiateh kular ha pdeng ka sorkar bad ka NEEPCO kan wan rah ia ka jingkylla ha ka pyrthkat ha ka jingbeit pisa ha ki kam pynroi ha ka jylla.
La ong ba ynda ka sorkar kala lah ban pynmih bun ka bor ding da ka jingiatreilang bad ka NEEPCO ka jylla kan sa lah ban die ha ki snem ban wan, ia ka soskular la soi da u DD Shira Joint Secretary ka jylla Meghalaya bad na ka liang jong ka NEEPCO la soi da u Anil Kumar, Director Personnel, ha ka kyrteng ka NEEPCO.
Kiwei kiba la ia don lang ha kane ka jingialang ban ia soi ia ka soskular ki long u Abdus Saleh, Chairman, Meghalaya State Planning Board, u Pravin Bakshi, Commissioner bad Secretary, Power Department, ryngkat ki heh sorkar jong ka jylla Meghalaya bad na ka NEEPCO ruh kum juh.
