Shillong, Naitung 12: U Deputy Chief Executive Member jong ka KHADC u bah Pynshngianlang N Syiem haba jubab ia ka jingkylli jong u bah T.W Chyne ha kaba ia dei bad ka Delimitation, la ong ba la phah sha ka Select Committee kaba la wanrah ha kane ka sien shong dorbar kaba mynta.
Haba jubab ia ki jingkylli bynrap ba la kylli na u nongialam ka liang pyrshah u Bah Pynshngian la ong ban pynlong ia ka Election sha ki District Council kamd ei eh tang ha ka kti jong ki District Council.
La ong ba ki long kiba la kloi ban ia khun ia ka elekshon ha kano kano ka por lada la khot ban pynlong ia ka elekshon, la ka dei ban long ha ki konstitwensi kiba rim lane lada pynlong ha ki konstitwensi kiba thymmai ki long kiba la pynkhreh.
Kane ka jingthaw ia ka Select Committee ka long ban peit bniah ia ki konstitwensi namar ban ialeh ban wanrah ia ka jingdon ki nongthep vote kiba mar ia ryngkat namar, ki don ki konstitwesi kiba laduna palat bad don kiba la bun palat.
La ong ba ka Select Committee kan shong noh kloi ha dien ba la pynmih ia ka jingpynbna na ka ophis jong u shongknor bad ki kwah ban pyndep kloi bad lada don kam ban khot ia ka dorbar kyrpang ruh kin sa leh ia kaba don kam.
