Shillong, Nailar 15: Ha ka jingkren u myntri rangbah ka jylla ha ka jingrakhe ia ka sngi Laitluid kaba 78th mynta ka sngi ha Madan polo la ong ba ka Ri India kan sa dap 100 snem ha u snem 2047 bad ka jylla Meghalaya kan dap 75 snem.
Ban pynsah kynmaw ia kaba ka jylla kan sa dap 75 snem ha u snem 2047, la buh ia ka thong ba ha ka jingrakhe ia ka jingdap 100 snem ka jinglaitluid ka Ri India bad 75 nsem ka jylla , kwan ban iohi ba ka ioh ka kot ka jylla kan kot sha ka 100 billion dollar.
Ban pynpoi sha katei ka thong ka sorkar kala shim bun ki lat ki lynti bad kaba ha khmat eh ka long ban shna ia ki surok ban pyniasoh ia ki shnong ki thaw kiba don sha ki thaw bad kiba don sha ki lum, la iathuh ba ka sorkar kala ioh T.2500 klur ban shna surok.
U la ong haba u leit kylleng ka jylla bad haba ia kren bad ki nongrep , ki nongkhaii, kiba ieit ia ki jingialehkai, ki long kmie, ki samla bad kum juh ia ki riew paidbah, u don ia ka jingiohi kaba shai ban trei na ka bynta ban kyntiew ia ka jylla.
Ka sorkar kala shim bun ki lat ki lynti ban kyntiew ia ka rep ka riang bad ban pyniaid iew ia ki marrep, ym tang hapoh ka ri India hynrei sha bar jong ka Ri India, ka jingshna iaki surok kan iarap ia ka kit ka bah, ka jingpynbha ia ki jaka pule.
Haba phai sha ka koit ka khiah ka sorkar kala dep ban shna 30 tylli ki Dispensary bad sa 100 tylli kiba dangshan kin da dep noh shem, kane ka long ban ai ia ki lat jingsumar sha ki nongkyndong ba kin ioh ia ka jingsumar kaba biang.
Haba phai sha ki jaka sor,kum ka nongbah Shillong, Jowai bad Tura, ka sorkar ka sngewthuh ia ka jingeh kaba ki paidbah ki kynduh ha ka jingdheng kali, haba ia dei bad kane ka sorkar kala shim bun ki lat ki lynti ban shna ia ki jaka ieng kali bad bun kiwei kiwei kum ki jingpynbha ia ki lynti iaid kjat.
La ong ba ka jingbuh ia ka CM-Connect ka long ban ailat ia ki paidbah ba kin ai jingmut,ki pyntip bad ki phah ia ki jingujor sha u myntri rangbah bad ha ka juh ka por un leit sha baroh ki block ban sngap da lade ia ka jingeh jong ki paidbah bad ban ialeh ia kaba don kam.
Kumba juh log man u snem kala don ka jingiaid kilam met ki kynhun shipai, ki pulit ki NCC, ki khynnah skul ha kaba ia ka salute la shim da u myntri rangbah ka jylla, kala don ka jingshad na ki khynnah ksul bad ka jingpynkup burom ia ki pulit kiba la ioh ia ki khusnam bad ia ki nongjop ha kane jingiaid kilan met bad shad.
