Shillong, Kyllalyngkot 26: Ka KSU Mawlai Mawïong Umjapung Unit kum ka dak ka jingai sngewbha snem thymmai haka 26tarik Kyllalyngkot 2023 kala ïoh ban ai sngewbha da ki Kombor bad jaiñ tapmoh sha kumba 70ngut tam ki Nongshong Shnong jong ka Shnong Mawlai Mawïong Umjapung kiba la kham noh ka rta.
Hashwa ban sam ïa kitei ki jingai sngewbha kala don ka jing ïalang kaba lyngkot kaba la pynïaid da u Samla Wellborn Nonglang uba dei u General Secretary jong katei ka shnat treikam, laïoh ruh ïaka jingïalam haka jingdwai da kawei ka longkmie.
Lapdiang sngewbha ïa kitei ki nongïoh sngewbha, ki nongïalam Shnong naduh u Assistant Rangbah Shnong ha ryngkat bad I Secretary jong ka Shnong bad ruh ïaki nongïalam ka KSU Mawlai Circle bad ki nongkitkam na kiwei pat ki Unit da u Samla Twist Marngar uba dei u Vice – President jong katei ka shnat treikam.
Laïoh ruh ïa ki kyntien sneng kyntien khraw bad kumjuh ka jing kyrkhu kyrdoh na u Assistant Rangbah Shnong bad uba la kyntu ruh ïaki dkhot jong ka KSU ba kin long kum ka jingshai sha kito kiba la ngop haki jingdum bad ban long kum ka mluh ïa kito kiba la mad ïaka jingblad noh haka jingim jong kiba bun ki briew.
U la kyntu ruh ïaki dkhot jong ka Seng ba kala donkam kyrkieh ban ïa syllok bad kito ki khun naka longïing kiba ym don shuh ïa u Kpa ka ïing bad ban pyni lynti ïaki ba kin nang ban ïaid haka lynti kaba dei bad ba kan long ka jing kyrkhu ïa kiba kum kita ki longïing.
Khatduh la ïoh ïaka jingkren na u Samla Rapborlang Nongrum General Secretary jong ka KSU Mawlai Circle bad ha kajuh ka por Uba dei u Assistant Finance Secretary jong ka KSU Seng kmie, haba ai jingkren naka utei u Samla u la pynpaw ba kum ka Seng wat hapdeng ka jing bunkam ban ïakhun ïaksaid naka bynta kiba bun ki mat ki jura kiba ktah matïong ïaka Ri bad ka Jaidbynriew.
Hynrei kam shim klet ban ai ka jing shakri hala ki jong ki Shnong ki thaw kiba kum ka Seng ka don ïaki shnat treikam, bad manla ka por naka liang jong ka Seng ka ka ju bthah ïa manla ki shnat treikam ba ki dei ban ai ïaka jing ïatreilang bad ki Dorbar Shnong.
Ki Seng Longkmie bad ki Seng Samla Shnong khnang ba ngin lah ban kyntiew ïaka Shnong ka thaw bad kumjuh ruh ïaka imlang ka sahlang hi baroh kawei, hashwa ba un pynkut ïaka jingkren ula kyrpad ïaki nongïoh sngewbha ba watla i jingai i long iba rit pynban kin pdiang da ka jinghun ïaka jing pynkhreh jong ka Seng hala ka jingkot bor katba ngi lah ei.
