Pynursla, Rymphang 17: Ka Civil Sub Division Pynursla shen kan sa ioh ia ka ophis trei kam ba pura namar ka jingtei iaka ophis ha Wahpathaw kala dang iaid sha khmat bad kumba ka long mynta ka jingtei ia kane ka ophis kala iaid sted bha.
Ka jingshna ia ka ophis ba pura ka long sha rum jong ka shnong Pynursla, kane ka ophis kaba thymmai kam da jngai na surok bah ban leit sha Dawki, ka iing kaba la shna ka long armala bad ka jaka kaba kylluid, ia ka surok na surok bah sha ka ophis SDO la dep ban shna.
Kane ka jaka kaba la shna ka long kaba long pdeng na ka bynta ki shnong kiba don sha neng jong ka Pynurlsa bad kiba sharum jong ka Pynursla, kane ka jaka kaba la shna ia kane ka ophis ka hap hapoh jong ka raid Shabong, ka tei ka ophis ka don ha pdeng ka Phlangdkhi, Urksew bad ka jaka ba tei ka ophis ka dei ka Wahpathaw.
Lah ban pynkymaw, ba ia ka Civil Sub Division Pynursla la plie da u Dr. Mukul Sangma myntri rangbah ka jylla ha u snem 2017, kane kala pynkmen ia ki paidbah ka thain bad ia kane ka iing la ioh ban shna tang hapoh hynniew snem.
