Shillong, Nailar 26: U bah Lambokstarwell Marngar president ba rim ka KSU bala khlieh ia kane ka jingiakren bad ka sorkar kaba la khlieh da u myntri rangbah ka jylla mynta ka sngi, u la ong ba ka Executive Committee kaba thymmai jong ka seng Khasi Student Union kaba la lam khmat da u samla Raymond Kharjana kila daw aba ka sorkar kan shim iaka rai ban pyrshah tih Uranium ha iing dorbar.
Haba kren ha ki lat pathai khubor ha dien ka jingiakren bad ka sorkar u bah Lambokstarwell Marngar ula ong ba mynta ka sngi la iohi ba ka sorkar kala wanrah ia ka rai hapoh iing dorbar ban pyrshah tih Uranium ha kaba la ia shimbynta la jan baroh ki MLA, kaei kaba ki kwah ban ong ba kam dei ban kylla pyrdet ha dien ba bud kaba ka seng ka pynsngew.
Ha kane jingiakynduh bad ka sorkar mynta ka miet halor ki san tylli ki mat jingdawa bad kaba ha khmat ka dei ka jingpynsngap paidbah haba ia dei bad ka Shree Cement Kompeni, ba dei ban pynduhnoh bad weng kamnoh shipor ia u DC bad SP Katei ka District, haba ia dei bad kane la pdiang ban don ka kynhun tohkit kaba lait luid.
Haba ia dei bad ka MRSSA 2016 bad ka sorkar kala wanrah ia ka jingpynkylla ha u snem 2020 kaba la wanrah ia ka kynrum kynram ban poi sha u Lat bad sha ka sorkar pdeng bad ka pdeng kala pan ka jingpynshai ka sorkar jylla bad la don ruh kiba leit ban ujor sha iing bishar.
Ka seng ka kwah ban iohi ba ki khyrdop ban talsi ia ki mynder ki dei ban ieng noh namar ki don 18 tylli kumba la pruid dak ha ka ain 2016, haba ia dei bad ka Umling kin la leit ban jurip lang ban sdang noh kane ka kular na u myntri rangbah bad kum juh ia ka Ratachera.
Haba ia dei bad ka NEIGRIHMS ki tip ba kane ka dei ka kam jong ka sorkar pdeng bad kala don ka jingiakren ban ia kynduh bad ki bor ka sorkar pdeng ban ia kren markhmat, haba ia dei bad ka thung kam thungjam ha MPSC bad DSC, ka sorkar kala pyndon iaka Group C ia ka D kin dang hap ban bishar bniah ki sngewthuh haba ia dei bad ka ain kam dei kaba suk.
U bah Lambokstarwel la ong ba ha kane ka jingiakren kila ioh kumba hynniewphew persent, kam dei shispah na ka shispah, ki jingdawa kiba ka seng kila buh ha khmat ka sorkar 20 tylli, mynta kila buh ha khmat san tylli, ia kiwei kin dang iai bteng ban ia kren, haba ia dei bad ka jingshah kem ki nongialam ka seng kim dawa ki ia kren ia ki mat ki jura ka shong ha ka jingstad ka sorkar kumno ban leh u la ong.
