Shillong, Iaiong 13: Halor ka huri hura kaba la mih ha ka miet sngi nyngkong ha khyrdop jong ka 58-GTC kaba la wan ia ka jingiamynsaw ka Deputy Commissioner jong ka East Khasi Hills District mynta ka sngi kala khot ia ka jingialang ha pdeng ki shipai, ki nongialam shnong ban ia kren halor katei ka jingjia.
Ha kane ka jingialang kaba la long mynta ka sngi kim shym la lah ban shim ia kano kano ka rai ha kaba ia dei bad katei ka khyrdop kaba don ha Mawshabuit wat la ka jingialang kala neh palat ia ka ar kynta ban ia thir halor katei jingiahuri hura kaba la mih na ka daw jong ka jingkhang ia ka khyrdop.
Ha dien jong ka jingialang na ka liang jong ki nongialam shnong ka shnong Mawshabuit haba kren ha ki lat pathai khubor u la ong ba kum ka shnong ka kwah ba ia kane ka khyrdop dei ban weng noh kane ka dei kaba ka shnong kala pynpaw ha kane ka jingialang mynta ka sngi.
U rangbah shnong u bah Richard Nongkhlaw u la ong ba kane ka jingjia kam dei kaba tang mynta hynrei kala jia bun buns ien bad kane kala buh ia ki paidbah nongshong shnong hapdeng ka jingeh na kawei ka por sha kawei ka por bad la kyntu ia ka sorkar ba kan weng noh ia kane ka jingeh ba ki paidbah nongshong shnong kin leit da kaba suk ba sain.
Ha kane ka jingiakren na ka liang jong ki shipai kim lah ban shim ia ka rai namar ki hap ban ia kren bad kane ka phang hynrei kinsa don ka jingiajurip lang ha kine ki sngi ban wan, ha kane ka jingialang mynta ka sngi la don lang ruh ki dkhot ka KSU, FKJGP, seng samla shnong ka shnong Mawshabuit.
