Shillong, Jylliew 11: Kum shibynta ban pynneh pynsah ïa ka mariang kaba khuid ba suba, ban pynduna ïa ka jakhlia ka ba mih manla ka sngi, ban hikai bad ban pynkynmaw ïa ki para nongshong shnong kumno ban sumar ïa ka sawdong sawkun jong ka mariang, ka Khasi Students’ Union (KSU) ha ka 5 tarik u Jylliew 2026.
Ka la ïoh ban rakhe ïa ka sngi pynneh mariang (World Environtment Day 2026) lyngba ki shnat treikam jong ka ha manla ki Districts, ki Circles bad ki Units bapher bapher ha kylleng ka Ri khasi. Ha Katei ka Sngi la iashim bynta ruh da ki Nongialam Shnong bad ki Skul bapher bapher kiba don hapoh kitei ki shnat treikam.
Ha kane ka sngi ka Khasi Students’ Union North Khasi Hills District Unit kala ïoh ban rakhe ïa kane ka sngi Kyrpang da kaba sam ïa ki 3000 tylli ki tynrai dieng sha baroh ki Circles ki Units kiba don hapoh Ka KSU North Khasi Hills District Unit bad ha kane ka juh hi ka sngi la ïoh ban thung ïa baroh 3000 tylli ki tynrai dieng ha ki Circles ki Units bad Border Area ka thaiñ ri Bhoi.
Ka Khasi Students’ Union Sawmer Unit, ka la ïoh ban rakhe ïa kane ka sngi da kaba pynlong ïa ka World Environment Day Exhibition programme, ha Sunny Side Hall Sawmer, ha kaba u samla Shngaiñlang Sohkhlet President KSU Upper Shillong Circle u la long u Kongsan bad i samla Phaldarisha Kharpan Environment Secretary KSU Upper Shillong Circle Kum u Symbud kongsan.
Ha kane ka Programme la ïoh ban wan shim bynta da ki khynnah jong ki saw tylli ki skul kiba don hapoh ka shnong Sawmer, ha kaba la ïoh ban sakhi ïa ki sap ba kyrpang jong ki khynnah skul ha ka ban shna bad pynwandur ïa ki jingshna ne ki models ryngkat ki jingbatai kaba shai kumno ban pynneh ïa ka sakun mariang kaba khuid ba suba.
Shuh shuh lyngba kane ka programme ki khynnah ki la ïoh ruh ka lad ban ïalap ïa ka jingdonkam ban sumar ïa ka sawkun mariang sha ki para khynnah bad kumjuh wat ïa kiba la san ruh kat kiba don lang ha kane ka sngi. Ha kane ka sngi nalor ki khynnah skul la ïoh ban ïa don bynta bad sakhi lang ruh da ki dkhot bad nongïalam Seng Samla Sawmer, ki Dkhot ka Villages Organization Sawmer (V.O), bad ki wei ki wei.
Ka Khasi Students’ Union Mawkriah Sadew Laitjem Area Unit, pat kum ka dak jong ka jingrakhe ïa ka sngi pynneh Mariang (World Environment Day) ha kane ka sngi ka la pynlong da ka jingïalap paidbah shaphang ka jingkordor jong ka mariang na ka bynta ka jingim ki briew ha kane ka pateng bad khamtam na ka bynta ka pateng ka ban wan bad kumno ruh ban sumar ïa kane ka mei mariang kaba ngi shong ngi sah da kaba sam ïa ki kot lyngkdop sha ki paidbah kiba ïaid ba ïeng lyngba ka surok bah kumjuh ruh sha ki nongjngoh kai pyrthei kiba dei ïaid lynti na kane ka surok.
Shuh shuh ka Seng ka la ïoh ban buh da ki tin buh ñiut (dustbin) sha ki katto katne ki jaka bad ki lad jong ka shnong khnang ba kiba ïaid ba ïeng kin bret ïa ki ñuit ki ñier ha ki jaka ba dei khnang ban lait na ka jingjaboh jong ka mariang.
Ka Khasi Students’ Union Mawlai Circle, pat ha ka jingrakhe jong ka ïa kane ka sngi pynneh mariang ka la phai khmat ha kaba ïadei bad ki dohkha dohpnat, ha kaba ka la ïoh ban pynlait da ki dohkha symbai ha Wah Umsohlang kaba don ha ka shnong Mawlai Kynton Massar, kane ka jingleh jong ka ka Circle la long ban pynneh pynsah ïa ki dohum dohwah kiba la sdang ban duna bad duhjait katba nang ïaid ki sngi ki por.
Ka Khasi Students’ Union Lummawbah Unit, ka la ïoh ban rakhe ïa kane ka sngi pynneh mariang halor ka phang “Ban ïada bad ban pynneh pynsah ïa ka mei mariang” da kaba pynlong ïa ki program bapher bapher kata ka: Exhibition program, Awareness Poster Competition, Drawing and Colouring Conpetition bad ka Awareness na ka bynta ka Khuid ka Suba, ha kaba u Samla Shelkitbok Kharabani u la long u Kongsan.
Ha kane ka sngi la ïoh ban ïashim bynta da ki khynnah skul napher bapher kiba don ha poh ka shnong Lummawbah, la pynshngaiñ shuh shuh ha kane ka sngi da ka jingdon ryngkat i Rangbah shnong ki Nongkitkam shnong bad ki Nongkitkam jong ka Sengsamla shnong Lummawbah.
Ka Khasi Students’ Union (KSU) NEHU UNIT, ka la ïoh rakhe ïa ka sngi Pynneh Mariang ban pynneh pynsah ia ka mariang kaba khuidba suba da ka “Cleaning drive” shabar jong ka khyrdop (gate) jong kane ka skul bah, kata ka long naduh ka khyrdop ba 1 haduh khyrdop ba 3, ha kaba kine ki dei ki lynti ban rung hapoh ka Skul Bah NEHU bad kane ka jingrakhe ïa ka sngi pynneh mariang da kaba pynkhuid pynsuba ym tang na ka bynta ban itynnat ka lynti syngkieng, hynrei ban sumar khuid na ka bynta ki pateng ban wan, khnang ba kin ïoh ïa ka lyer ba khuid.
Kane ka sienjam ba ka KSU NEHU Unit ka la shim ka long ban pynkynmaw ïa baroh ba ka jingpynneh pynsah ïa ka mariang kaba khuid ba suba kam dei tang ka kamram jongno re jongno, hynrei ka dei ka kamram longbriew manbriew jong baroh iwei pa iwei.
Ka Khasi Students’ Union Mawkyllut Unit, kum shi bynta ban rakhe ïa ka Sngi Pynneh Mariang ka la pynlong da jingpynkhuid ïa ka Wah Mawpon/Wah Sala kumjuh ruh ban thung ïa ki tynrai dieng harud jong kane ka Wah, shuh shuh ha kane ka sngi ka Unit ka la ïoh ban buh ïa ki jaka buh ñiut (Dustbin) ha ki khyrdop Skul, ki khyrdop Bank bad ha ki lad jongka shnong Mawkyrwat khnang ban ïarap na ka jingbret pathar ïa ki jaboh khamtam ki plastik kiba long ki nongpynsniew dur ïa ka mariang.
Ka Khasi Students’ Union Mawkyrwat Circle, pat ka la rakhe ïa kane ka sngi da kaba pynlong ïa ka jingpynkhuid ïa ka Ïew Umjaraiñ kaba don hajan ka Um shit (Hot spring). Ha kane ka jingpynkhuid ïa kane ka ïew la wan ban ïashim bynta ruh da ki Nongïalam Shnong, ki Seng longkmie, ki Seng Samla Shnong, ki Nongshong Ïew, ki khynnah Skul bad ki dkhot ka Seng na ki Shnat treikam bapher bapher jong ka Seng ha katei ka thaiñ, bad ha kajuh ka por ka Seng ka la pynlong ruh ïa ka jingthung ïa ki tynrai dieng ha St. Xavier’s College Umoid South West Khasi Hills District ha kaba la wan ban ïashim bynta naduh ki Phadar, ki samla pule jong kane ka Kolej ryngkat ki dkhot jong ka Seng.
