Shillong, Nohprah 24: U Myntri Rangbah ka jylla u Conrad K Sangma u la pyntip ba ka MeECL kala trei shitom bha ban bujli ia ki Transformer ha ki shong bapher bapher ha ki nongkyndong ha kane ka jylla Meghalaya kiba don haduh 340 tylli ki shnong.
U Mytnri rangbah u la ai khublei kyrpang ia ki nongtrei ka MeECL ba wat ha pdeng kane ka por leh kmen Khristmas ki trei shitom ban pyndep iala ka kam jong ki ban pynpoi ia ka bor sing sha ki shnong kiba la duh lait na kadaw jong ka jingsiew ki transformer.
U Myntri Rangbah ka jylla u la ong ba ka jinglut baroh ha kane ka jingpyndait ia kine ki transformer ba thymmai kala kot sha ka T.10 klur tyngka bad ka jingtrei shitom ka long ba kila lah ban pyndep ia kane jingbujli ia ki transformer hapoh ki 45 sngi.
Ryngkat ki nongtrei ka MeECL na ka liang jong ki paidbah ruh kila ai ia ka kti kamon ka diang jong ki ban iarap ban pynkit lem ia ki Transformer ban poi sha ki shnong namar bun na ki jaka hap ban shu bah da ka kjat ruh.
