Shillong Risaw 16: Lada lip light sha sor tang da ki minit la pynmeh wut wut hynrei sha nongkyndong, lada lip light jah da ki taiew rum ym ju don ba patiaw bad kum kane ka apot, ka la jia ia ka shnong Sohkynduh, Sohra ha kaba ka la mad ia ka jinglip light la bun taiew man ka por wat haduh kine ki sngi ruh.
Ha kane ka shnong Sohkynduh kaba don 160 tylli ki iing kiba khlem pat ring light sha ki iing ki sem ki dang don haduh 30 tylli, kaei kadaw kaba kim pat ring light sha ki iing ki sem ym lah ban sngewthuh.
U Sordar ka shnong Sohkynduh u bah Centre Phanbuh haba kren sha ki nongthoh khubor u la iathuh ba ka shnong haduh kine ki sngi ka shu shong beit ha ka jingdum khlem kano kano ka jingshai Ding.
Watla ka la poi bording ha kane ka shnong, hynrei kaba sngewsih ka long ba u ksainar light la dep ban pynpur hynrei ka light pat kam don, la iathuh ba wat ki mashin ruh kila duh bad haba ki leit ban ujor hynrei kim lah leh ei ei kumta ki hap banshong dum, laong u sordar shnong bah Pahnbuh.
La ong ba naduh ba ioh bording myta u sem 2022, hynrei ka light ka shu meh tang shi taiew ar taiew bad ka la lip lynter, na ka liang jong u sordar ka shnong Sohynduh u la kyrpad ia ka sorkar ba kan leh ei ei ba kin ioh jingshai.
U bah Centre Phanbun la iathuh ruh ba ka jingeh kaba kane ka shnong ka kynduh dei ka jingsniew palat ka surok, ka jingbym biang ka umbam umdih, ka koit ka khiah bad kum juh ka pule puthi ruh ka dang duna ha kane ka shnong.
U bah Blik Shrieh u la ong ba ka shnong Sohkynduh ka dei kaba sahdien bha bad kan bha lada ka sorkar kan isynei ban wanrah noh ia ka Sub-centre ban ai ka jingshakri kaba kham bha ia ki paidbah ha ka koit ka khiah jong ki nongshong shnong bad ki marjan shnong.
Ka shnong Sohkynduh kaba bun ki im na ka rep synsar bad kiwei ki jingthung. U bah Centre u la ong ba ka jingeh ha shnong kiba bun kum ka umbam watla ka don hynrei kam pat biang, ka pule puthi bun kiba dang sahdum, ka don ka skul kawei jong ka Balang Katholik bad kawei ka Presbyterian haduh klas tang haduh Klas 8.
Ki kam ba kongsan kaba ki briew kane ka shnong ki rep dei u synsar, watla ki don kiba rep tympew, soh, jhur, kwai bad kiwei hynrei uba kham ia rep paidbah u dei u synsar, la aiathuh ba kumba ka long mynta u snem ka dor jong u synsar u khlam lah dor namar kila lah ban die haduh .100 tyngka shikilo ha shnong.
