Shillong, Lber 10:U Myntri ba dei peit ia ka tnad kam bording u A.T. Mondal haba jubab ia ka jingkylli u bah Brightstarwell Marbaniang u la ong ba ka jingshna pynbha ia ka Mawlai Sub-Station na 3×20 MVA sha ka 3×50 MVA hapoh ka skhim NESIDS-OTRI la khein thymmai ia ka jinglut kam dei shuh T. 49.98 klur hynrei ha ka jingkhein kaba thymmai ka jinglut kan long T.79.23 klur.
U Myntri la pyntip hapoh ka iing dorbar ba ka DoNER ka la pdiang ia kane ka dor ba thymmai ha ka 16/01/2025,na katei ka jinglut kaba T.79.23 klur ka tnad DoNER kan bei T.49.8 klur bad ia kaba duna T.29.43 klur kan hap ban lut da ka sorkar jylla,ia kane yn pyntrei da ka MePTCL.
Haba jubab ia ki jingkylli bynrap u Myntri u la iathuh ba ia ka tender kaba la khot ha u snem 2019 la hap ban weng noh na ka daw ba ki don ki jingduna ha ki kyndon jong ka tender,ka ophis ka la pynkhreh biang ia ka tender kaba thymmai hynrei ka wan noh ka khlam COVID kumta ka jingtrei la sah teng dei tad haduh ka 16/01/2025 ba ka DoNER ka la pdiang ia kane ka skhim.
Na ka liang ka sorkar ka la iakren bad ki bor jong ka sorkar pdeng khamtam ka DoNER bad kiwei kiwei haduh ban da ioh ia ka jingmynjur bad ka sorkar ka la dep pynbiang ia ki jingdonkam kumta ia ka tender haba iadei bad kane ka jingtrei ban pynbha ia kitei ki Sub-Station yn sa khot ha u bnai Iaiong ban wan.
U Myntri u la ong ba ia katei ka Sub-Station la shna ha u snem 1964 bad kumba 60% kiba pyndonkam ia ka ding elektrik ha kane ka nongbah Shillong ka dei lyngba kane ka Sub-Station,ia ka jingong iano ban ai ka shong ha ka jinglah ki kontraktor ba kin pynbiang ia ki kyndon ba la buh ha ka tender.
