Shillong, Nailur 29: Ka jingialang kaba ar sngi kaba la khot da ka Khasi Author Society (KAS) kala sdang mynta ka sngi ha nongbah Delhi ha kaba la plie da u MP jong ka 1-Shillong parliamentary Konstitwensi u bah Vincent H Pala, ha ka jingiadon lang ka kong Ampareen Lyngdoh myntri ka sorkar jylla.
Na ka liang jong ka KHADC la don lang u Shongknor ka KHADC u bah Lamphrang Blah, Em bah Teiborlang Pathaw, bad ki nongkit kam ka seng KAS bala lam khmat da u Dr. DRL Nonglait President, ha kane ka jingialang ka seng HANM ruh ka la phah ia dkhot ba kin ia don lang ha kane jingialang ban ia kren halor ka ktien Khasi.
Ka jingpynlong ia kane ka jingialang kaba ar sngi ha Nongbah bad ka phang jong kane ka jingialang kaba ar sngi ki long, halor ka ktien khasi, ka literature bad ka Kolshor, kum kane ka jingialang ka die ka sien kaba nyngkong.
Ha ka jingkren plie ia ka jingialang bah Vincent u la ong ba khnang ba ka ktien kan neh dei ban kren bad dei ban thoh, ka ktien kam dei eh tang ia kren iwei ia iwei hynrei ka dei ruh ka kdew ruh ia ka riti dustur bad ia ka kloshor, dei na kata ka daw ban pynneh pynsah ia ka ktien.
